ខេត្តកណ្តាល៖ប្រមុខរាជរដ្ឋាភិបាលបានព្រមានយ៉ាងច្បាស់ថាក្នុងអាណត្តិទី៥នេះត្រូវលុបបំបាត់អំពើពុករលួយឲ្យដល់ឫសគល់ ខេត្តកណ្តាល ៖ ប្រមុខរាជរដ្ឋាភិបាល បានព្រមានយ៉ាងច្បាស់ថា ក្នុងអាណត្តិទី៥ នេះ ត្រូវលុបបំបាត់អំពើពុករលួយ ឲ្យដល់ឫសគល់ ហើយក៏មានការចាប់ឃាត់ខ្លួន មន្ត្រីបម្រើការងារនៅ អគ្គនាយកដ្ឋាន ពន្ធដារម្នាក់ផងដែរ ដូច្នេះគេចង់ឃើញលោក ឳម យ៉ិនទៀង ចាត់វិធានការ ចំពោះអំពើពុករលួយ ដែលកំពុងកើតមាន ក្នុងអង្គភាពពន្ធដារ ខេត្តកណ្តាលផងដែរ។
ប្រជាពលរដ្ឋ រស់នៅក្នុងស្រុកស្អាង ខេត្ដកណ្ដាល បានលើកឡើងថា កន្លងមកការបង់ពន្ធដី ចំពោះការផ្ទេរកម្មសិទ្ធិដីធ្លី ទាំងទំហំដីតូចនិងដីធំ នៅស្រុកស្អាង គឺលោក រស់ ផល្លា ដែលជាមន្ដ្រីបម្រើការ នៅមន្ទីរពន្ធដារខេត្ដ កណ្ដាល ជាអ្នកទទួលបន្ទុកគ្រប់គ្រង ប្រមូលពន្ធដោយលោក រស់ ផល្លា បានកំណត់តម្លៃសេវាពី ១.៦០០ ដុល្លារទៅ ១.៧០០ ដុល្លារ ប៉ុន្តែសម្រាប់អ្នកយល់ដឹង ពីការបង់ពន្ធដី គឺលោក រស់ ផល្លា សម្របសម្រួលយកលុយ ត្រឹមតែ ៣០ ម៉ឺនរៀល ឬមួយលានរៀលប៉ុណ្ណោះ ។
ច្រើនឆ្នាំមកហើយដែលការ កំណត់ឱ្យបង់ពន្ធដី លោក រស់ ផល្លា មិនបានបញ្ជាក់អំពី តារាងបង់ពន្ធដីណាមួយ ប្រាប់ប្រជាពលរដ្ឋជាសាធារណៈថា តំបន់ណាបង់ពន្ធថ្លៃ តំបន់ណាបង់ពន្ធថោក និយាយរួមគឺលោក រស់ ផល្លា សិក្សាទៅតាមស្ថានភាព នៃការរស់នៅរបស់ប្រជាពលរដ្ឋ ដែលជាម្ចាស់ផ្ទះ ម្ចាស់ដីថាមានជីវភាពលំបាក ឬធូរធារ ទើបគាត់កំណត់ឱ្យបង់ពន្ធ ទៅតាមតែបបូរមាត់ ឬការទាមទាររបស់គាត់ ។
ជាក់ស្តែងដីមួយចំនួន នៅម្ដុំផ្សារ អ្នកខ្លះបង់ពន្ធជាង ១.០០០ ដុល្លារ អ្នកខ្លះទៀត បង់ក្រោមតម្លៃនេះ ប៉ុន្ដែជាទម្លាប់យ៉ាងហោចណាស់ក៏លោក រស់ ផល្លា ទាមទារឱ្យបង់ពន្ធ ពេលផ្ទេរកម្មសិទ្ធិម្ដងៗចំនួន ៣.០០០ ដុល្លារ ហើយតម្លៃនេះក៏ជាការ តថ្លៃគ្នាដូចក្នុងផ្សារត្រី រហូតចុះត្រឹម ១.៧០០ ដុល្លារឬ ២.០០០ ដុល្លារ ទើបលោក រស់ ផល្លា នឹងជួយសម្រួលថ្លៃបង់ពន្ធ។
ប្រជាពលរដ្ឋឆ្ងល់ថា ការបង់ពន្ធដីនៅស្រុកស្អាង ឬក្នុងខេត្ដកណ្ដាល ប្រធានសាខាពន្ធដារខេត្ដ បានកំណត់ឱ្យមន្ដ្រីពន្ធដារ ទទួលបន្ទុក គ្រប់គ្រងប្រមូលពន្ធ តាមបណ្ដាស្រុកនីមួយៗដូចដែលលោក រស់ ផល្លាកំពុងធ្វើ ឬមួយយ៉ាងណា ? ប្រជាពលរដ្ឋ បានដាក់ការសង្ស័យថា ប្រហែលជាទម្លាប់ ដែលពួកគេកំពុងតែប្រព្រឹត្ដ អំពើពុករលួយ ស្របពេលដែល ប្រជាពលរដ្ឋពុំបានដឹងច្បាស់ ពីការបង់ពន្ធ និងមិនដែលបានឃើញ តារាងបង់ពន្ធដី ទើបមន្ត្រីពន្ធដារចេះតែធ្វើអ្វីៗ តាមតែបបូរមាត់៕
Source from: watphnom-news.com
Loading...
Loading...
