បុរសខ្លាំងរបស់ស៊ីរីលោក Bashar al-Assad បាននិយាយជាសាធារណៈថា រដ្ឋាភិបាលក្រុងវ៉ាស៊ីនតោនបានចោទរបបរបស់លោកថាបានប្រើប្រាស់អាវុធគីមីវាយប្រហារក្រុមឧទ្ទាម ក៏ប៉ុន្តែអាមេរិកគ្មានភស្តុតាងនោះទេ ដើម្បីដាក់បន្ទុកចំពោះការចោទប្រកាន់របស់ខ្លួន។ លោក Bashar al-Assad បានថ្លែងបែបនេះប្រាប់អ្នកសារព័ត៌មានរបស់អាមេរិកនៅក្នុងបទសម្ភាសន៍មួយ។
សូមបញ្ជាក់ថា បញ្ហានៅស៊ីរីចាប់តាំងពីមានការវាយប្រហារក្នុងប្រទេសស៊ីរីកាលពីថ្ងៃទី២១ ខែសីហាកន្លងទៅដែលបណ្តាលឲ្យមនុស្សជាង១ពាននាក់បានស្លាប់មកភាពតានតឹងរវាងស៊ីរី និងប្រទេសមហាអំណាច ជាពិសេសអាមេរិកតែម្តងបានកើនឡើងយ៉ាងខ្លាំងព្រោះ ប្រទេសទាំងនេះបានចោទប្រកាន់ថា វាជាករណីប្រើប្រាស់អាវុធគីមីរបស់រដ្ឋាភិបាលស៊ីរី។
តែប្រទេសមហាអំណាចមួយចំនួនដូចជា អង់គ្លេស អាល្លឺម៉ង់ជាដើម ដែលដំបូងឡើយចង់បើកការវាយប្រហារនោះស៊ីរីជាមួយអាមេរិកដែរនោះ បានប្រកាស ដកខ្លួននៅក្នុងការវាយប្រហារនេះហើយកាលពីពេលថ្មីៗនេះ។
ចំណែកប្រទេសមហាអំណាចធំៗពីរទៀត គឺចិននិងរស្ស៊ីវិញ បានបដិសេធដាច់អហិង្កាចំពោះការចង់អន្តរាគមទៅលើរដ្ឋាភិបាលស៊ីរីរបស់រដ្ឋាភិបាលអាមេរិកផងដែរ។ មិនតែប៉ុណ្ណោះប្រទេសទាំងពីរនេះបានប្រកាសថា នឹងជួយស៊ីរីប្រសិនបើអាមេរិកបើកការវាយប្រហារមែននោះ។
ជាមួយនឹងជំហរអាមេរិកក្នុងការធ្វើអន្តរាគមន៏នៅស៊ីរីនេះអគ្គលេខាធិការអង្គការសហប្រជាជាតិ លោកបាន គីមូន បានប្រកាសហើយថា ការចូលអន្តរាគមន៏ដោយគ្មានការយល់ព្រមពីក្រុមប្រឹក្សាសន្តិសុខរបស់អង្គការសហប្រជាជាតិ នឹងនាំឲ្យមានការភាពច្របូកច្របល់កាន់តែខ្លាំងថែមទៀត។
ទោះជាយ៉ាងណាក៏ដោយ កាលពីថ្ងៃសៅរ៍កន្លងទៅរដ្ឋមន្ត្រីការបរទេសរបស់សហរដ្ឋអាមេរិកគឺលោក John Kerry បាននិយាយថា មានប្រទេសជាច្រើនបានត្រៀមខ្លួនរូចរាល់ ដើម្បីចាត់វិធានការប្រឆាំងនឹងការប្រាស់អាវុធគីមីរបស់រដ្ឋាភិបាលស៊ីរី៕(ដោយៈជា ធីរិទ្ធ)
Source from: Vayofm
No comments:
Post a Comment