សហ​ព្រះ​រាជអាជ្ញា​​អន្តរជាតិ​នៅ​​សាលា​ក្តី​ខ្មែរ​ក្រហម​​លាលែង​​ដោយសារ​​មូលហេតុ​​ផ្ទាល់​ខ្លួន​

​វត្តមាន​របស់​លោក Andrew Cayley​ សហ​ព្រះរាជអាជ្ញា​អន្តរជាតិ​នៅ​សាលាក្តី​ខ្មែរក្រហម នឹង​លែងមាន​តួនាទី​បំពេញ​នៅ​ក្នុង​សាលាក្តី​កូនកាត់​មួយ​​នេះ​ទៀត​ហើយ​ចាប់ពី​ថ្ងៃ​ទី​១៦កញ្ញាខាងមុខនេះ។

​យោងតាមសេចក្តីប្រកាសព័ត៌មាន​ផ្ទាល់ខ្លួន​របស់​លោក Andrew Cayley កាលពី​ព្រឹក ថ្ងៃទី​០៩ កញ្ញា​នេះ​លោក Andrew Cayley​ បានបញ្ជាក់​មូល​ហេតុដែ​ល​លោក​ត្រូវ​លែង​ឈប់​ពី​តំណែង​នេះ គឺ​ដោយសារតែ​បញ្ហា​ផ្ទាល់​ខ្លូន​។​

ក្នុង​សេចក្តីប្រកាស លោក​Andrew Cayley​ បានបញ្ជាក់​ថា"​ខ្ញុំ​នឹង​ទៅ​រស់នៅ​ជាមួយ​គ្រួសារ​ខ្ញុំ ដែល​បាន​ត្រឡប់មក​ពី​ប្រទេស​កម្ពុជា​វិញ កាលពី​ខែ​មិថុនា ឆ្នាំ​២០១៣​។

តាម​ការរំពឹងទុក​សហ​ព្រះរាជអាជ្ញា​អន្តរជាតិ​បម្រុង​ជនជាតិអាមេរិក​លោក​Nicholas Koumjian​នឹង​មកដល់​ប្រទេស​កម្ពុជា​នៅ​ខែ​តុលា ឆ្នាំ​២០១៣​​​ខាងមុខ​។​

​នៅក្នុង​សេចក្តីប្រកាស​ដដែល​សហ​ព្រះរាជអាជ្ញា​អន្តរជាតិ​រូបនេះ សូម​ថ្លែងអំណរគុណ​ដល់​លោកស្រី​ ជា លាង សហ​ព្រះរាជអាជ្ញា​ជាតិ លោក​យ៉េត ចរិយា សហ​ព្រះរាជអាជ្ញា​រង​ជាតិ​និង​លោក William Smith​​ សហ​ព្រះរាជ​អាជ្ញា​រង​​អន្តរជាតិ​​ដែល​​បាន​​ផ្តល់​​បរិយាកាស​​ការ​ងារ​​ប្រកប​​ដោយ​​សហប្រតិបត្តិកា​រ និង​មិត្តភាព​ក្នុងពេលដែល​ពួកគាត់បាន​បំពេញការងារ​ជាមួយគ្នា​"​។​

ចុងបញ្ចប់​នៃ​សេចក្តីថ្លែងការណ៍​លោក​ Andrew Cayley ​ក៏​បាន​ជូនពរឲ្យ​តុលាការ​ខ្មែរក្រហម​ឲ្យ​ដំណើរការ​ទៅ​មុខ​បាន​ល្អ ហើយ​លោក​ពិតជា​សង្ឃឹម​​ថា បញ្ហា​ហិរញ្ញវត្ថុ​បន្ទាន់​មួយ​ចំនួន​ដែល​តុលាការ​កំពុង​ប្រឈមមុខ​នឹង​អាច​ដោះស្រាយបាន ដើម្បី​ឲ្យ​សំណុំរឿង​បញ្ចប់​បាន​ត្រឹមត្រូវ និង​តាម​ពេលវេលា​សមស្រប​។​

​គួរបញ្ជាក់​ថា សហ​ព្រះរាជអាជ្ញា​អន្តរជាតិ លោក​ Andrew Cayley ​បាន​ដាក់​លិខិត​លាលែង​ពី​តំណែង​ជូន​អគ្គលេខាធិការ​នៃ​អង្គការ​សហប្រជាជាតិ​​កាលពីខែ​សីហា ឆ្នាំ​២០១៣​។

​លោក​Andrew Cayley​ ជា​ជនជាតិ​អង់គ្លេស​ត្រូវបាន​តែងតាំង​ជា​សហ​ព្រះរាជអាជ្ញា​អន្តរជាតិ​នៅ​សាលាក្តី​ខ្មែរក្រហម កាលពី​ថ្ងៃ​ទី២៧ ខែវិច្ឆិកា ឆ្នាំ​២០០៩​ ដោយ​កាន់​តំណែង​ជំនួស​លោក​រ៉ូ​ប៊ែ ពើ​ទី​ត​ ជនជាតិ​កាណាដា ដែល​បាន​លាលែង​តំណែងចេញពី​សាលាក្កី​ខ្មែរ​ក្រហម​៕​(ដោយៈឆេង សូរិយា)

Source from: Vayofm