មិនមែនតែនៅស្រុកខ្មែរទេ ដែលមានអំពើឃាតកម្មប្តីសម្លាប់ប្រពន្ធ ឬប្រពន្ធសម្លាប់ប្តីតាមរូបភាពផ្សេងៗនោះ សូម្បីនៅសហរដ្ឋអាមេរិក ដែលប្តីបម្រើការងារនៅក្នុងកងកម្លាំងទាហានអាមេរិក ក៏ដាច់ចិត្តបាញ់សម្លាប់ប្រពន្ធខ្លួនឯង មានសម្រស់ស្រស់ស្អាត ជាជនជាតិសិង្ហបុរីដែរកាលពីពេលថ្មីៗនេះ។
ប្រភពព័ត៌មានពីបណ្តាញឃោសនាបរទេស បានឲ្យដឹងថា កាលពីថ្ងៃចន្ទ ទី២៨ ខែតុលា ឆ្នាំ២០១៣ មានករណីឃាតកម្មមួយបានកើតឡើងនៅរដ្ឋ Hawaii សហរដ្ឋអាមេរិក ដោយបុរសជាប្តីបម្រើការងារក្នុងកងកម្លាំងទាហានអាមេរិក បាញ់សម្លាប់ប្រពន្ធខ្លួនឯង ដែលមានសម្រស់ផូរផង់ជាជនជាតិសិង្ហបុរី នៅក្នុងផ្ទះតែម្តង រួចហើយប៉ុនប៉ងបាញ់សម្លាប់ខ្លួនឯងតាមក្រោយ។
ជនរងគ្រោះជាប្រពន្ធអាយុ៣៣ឆ្នាំ មានឈ្មោះ Tara Irdawati Isnin ជាជនជាតិសិង្ហបុរី បានរៀបការជាមួយមិត្តប្រុសរបស់ខ្លួនរួចហើយក៏ចាកចេញទៅរស់នៅឯសហរដ្ឋអាមេរិក ក្នុងរដ្ឋ Hawaii កាលពីខែសីហា ឆ្នាំ២០១៣ កន្លងមក។ នាងត្រូវបានស្មាមីបាញ់សម្លាប់នៅជាន់ទី១៩ នៃអគារលំនៅដ្ឋានក្នុងទីក្រុង Honolulu។
រីឯជនសង្ស័យជាស្វាមីរបស់ជនរងគ្រោះមានអាយុ៤០ឆ្នាំ ឈ្មោះ Leo Chavez បម្រើការងារក្នុងកងកម្លាំងទាហានសហរដ្ឋអាមេរិក។ ក្រោយពេលបាញ់សម្លាប់ភរិយារបស់ខ្លួនរួចហើយ ជនសង្ស័យជាស្វាមី បានប៉ុនប៉ងបាញ់សម្លាប់ខ្លួនឯងដែរតែមិនបានសម្រេចត្រឹមទទួលរងរបួស និងកំពុងសម្រាកព្យាបាលនៅមន្ទីរពេទ្យ។
មិនទាន់ដឹងអំពីមូលហេតុពិតប្រាកដ ដែលនាំឲ្យមានអំពើឃាតកម្មនៅក្នុងក្រុមគ្រួសារប្តី-ប្រពន្ធជាជនជាតិសិង្ហបុរីនេះនៅឡើយទេ ខណៈដែលសមត្ថកិច្ចរបស់សហរដ្ឋអាមេរិកកំពុងស្រាវជ្រាវស៊ើបអង្កេតក្នុងករណីឃាតកម្មទាក់ទងនឹងកងកម្លាំងទាហានអាមេរិកយ៉ាងមមាញឹក៕
Source from: www.dtn7.com
No comments:
Post a Comment