សមាជមហាជនរបស់គណបក្សសង្គ្រោះជាតិដឹកនាំដោយឯកឧត្តមសមរង្ស៊ីនិងឯកឧត្តមកឹមសុខាជាប្រធាននិងជាអនុប្រធានគណបក្សសមាជមហាជនរបស់គណបក្សសង្គ្រោះជាតិដឹកនាំដោយឯកឧត្តម សម រង្ស៊ី និងឯកឧត្តម កឹម សុខា ជាប្រធាននិងជាអនុប្រធានគណបក្ស ដែលធ្វើអស់រយៈពេលប្រមាណ៣ម៉ោងនៅទីលានប្រជាធិបតេយ្យ ឋិតក្រោមតំណក់ទឹកភ្លៀងនាវេលាល្ងាចនេះ បានបញ្ចប់ហើយក្រោមសម្រែកអបអរសាទរនិងទាមទាររកយុត្តិធម៌ក្នុងន័យគាំទ្រលើសេចក្តីសម្រេចចិត្តរបស់អង្គសមាជពីសំណាក់មហាជនចូលរួមចំនួនប្រមាណជិត១ម៉ឺននាក់។
អង្គសមាជបានសម្រេចប្រមូលស្នាមមេដៃអ្នកគាំទ្រធ្វើជាញត្តិដាក់ជូនអង្គការសហប្រជាជាតិនិងប្រទេសជាភាគីហត្ថលេខីនៃកិច្ចព្រមព្រៀងសន្តិភាពទីក្រុងប៉ារីស ស្តីពីកម្ពុជា ក្នុងថ្ងៃប្រារព្ធមហាបាតុកម្មថ្ងៃទី២៣ ខែតុលា ឆ្នាំ២០១៣ ខាងមុខនៅទីលានប្រជាធិបតេយ្យដើម្បីទាមទាររកយុត្តិធម៌ជូនប្រជាពលរដ្ឋជាម្ចាស់ឆ្នោត។
ក្នុងពិធីសមាជមហាជននេះដែរ ថ្នាក់ដឹកនាំគណបក្សសង្គ្រោះជាតិបានបញ្ជាក់សាជាថ្មីថា គណបក្សសង្គ្រោះជាតិនឹងបន្តរក្សាជំហររបស់ខ្លួនមិនចូលរួមបង្កើតរដ្ឋសភានីតិកាលទី៥ជាមួយគណបក្សប្រជាជនកម្ពុជាទេ ប្រសិនបើមិនទាន់មានការដោះស្រាយក្នុងការទាមទារយុត្តិធម៌ និងលើសពីនេះទៀតគណបក្សសង្គ្រោះជាតិអាចនឹងដឹកនាំប្រជាពលរដ្ឋជាម្ចាស់ឆ្នោតធ្វើមហាបាតុកម្មជាប់ជាប្រចាំនៅទីលានប្រជាធិបតេយ្យតែម្តង។
ដោយឡែក ឯកឧត្តម សម រង្ស៊ី ប្រធានគណបក្សសង្គ្រោះជាតិ បានមានប្រសាសន៍ឲ្យដឹងដែរថា ឯកឧត្តម នឹងធ្វើដំណើរទៅបរទេសនៅពេលខាងមុខដើម្បីស្វែងរកឲ្យមានការគាំទ្រពីអន្តរជាតិក្នុងកិច្ចការពារឆន្ទៈរបស់ប្រជាពលរដ្ឋខ្មែរ៕
Source from: www.dtn7.com
No comments:
Post a Comment