រាជធានីភ្នំពេញ៖គ្រោះថ្នាក់ចរាចរដ៏គួរឲ្យរន្ធត់មួយកើតឡើងកាលពីវេលាម៉ោង១០និង១៥នាទីយប់ថ្ងៃទី២៦ខែវិច្ឆិកា រាជធានីភ្នំពេញ ៖ គ្រោះថ្នាក់ចរាចរដ៏គួរឲ្យរន្ធត់មួយ កើតឡើងកាលពីវេលា ម៉ោង ១០និង១៥ នាទីយប់ថ្ងៃទី២៦ ខែវិច្ឆិកា ឆ្នាំ២០១៣ នៅតាមបណ្តោយ ផ្លូវសហព័ន្ធរុស្ស៊ី ក្នុងភូមិព្រៃជីសាក់ សង្កាត់ចោមចៅ ខណ្ឌពោធិ៍សែនជ័យ បង្កឡើងដោយរថយន្ត មួយគ្រឿងបើកបរលឿនដូចព្យុះ ក្នុងស្ថានភាពស្រវឹងជោកជាំ រេចង្កូតពេញផ្លូវ បានជ្រុលទៅ បុកម៉ូតូមួយគ្រឿង បណ្តាលប៉ើងមនុស្សជាច្រើនម៉ែត្រ ធ្លាក់មកវិញស្លាប់ភ្លាមៗ រួចក៏បង្ហួសទៅបុកម៉ូតូមួយគ្រឿង ទៀតអូសជិត ៥០០ម៉ែត្រ ប៉ុន្តែសំណាងល្អ អ្នកបើកម៉ូតូមានស្មារតីល្អ លោតចេញទាន់ រួចផុតពីសេចក្តីស្លាប់។
ជនរងគ្រោះដែលស្លាប់មានឈ្មោះ ឯម ម៉ៅ ភេទប្រុស អាយុ ៣០ឆ្នាំមានមុខរបរជាអ្នក បើកបររថយន្ត រស់នៅក្នុងភូមិត្រពាំងល្វា សង្កាត់កាកាប ខណ្ឌពោធិ៍សែនជ័យ ជិះម៉ូតូមួយគ្រឿងម៉ាកសេ១២៥ ពណ៌ខ្មៅ សេរីឆ្នាំ២០០៥ ពាក់ស្លាកលេខ ភ្នំពេញ ១អឹម ៩២១០ រីឯជនរងគ្រោះ ម្នាក់ទៀតមានឈ្មោះ ច័ន្ទ រិទ្ធី ភេទប្រុស អាយុ ៣៩ឆ្នាំជាអ្នករត់ម៉ូតូឌុប រស់នៅម្តុំវត្តសន្សំកុសល់ ផ្សារដើមថ្កូវ បានរងរបួសស្រាល ជិះម៉ូតូមួយគ្រឿង ម៉ាកវ៉េវអាលហ្វា ពណ៌ខ្មៅ ពាក់ស្លាកលេខ ភ្នំពេញ ១អា ហាស់ ៤៥៦៩ ចំណែករថយន្តបង្កវិញ ម៉ាកហាយឡែនឌ័រ ពណ៌ទឹកមាស គ្មានស្លាក អ្នកបើកបរត្រូវបាន គេស្គាល់ឈ្មោះ លាង សុផល ភេទប្រុស អាយុ៣១ ឆ្នាំជាមន្ត្រីនៅក្រសួងការងារ។
សាក្សីបានឲ្យដឹងថា មុនពេលកើតហេតុ ជនរងគ្រោះដែលស្លាប់ បានជិះម៉ូតូម្នាក់ឯង ក្នុងទិសដៅពីលិចទៅកើត ស្រាប់តែមានរថយន្ត មួយគ្រឿងម៉ាក ហាយឡែនឌ័រ បើករ៉េពេញផ្លូវ ជ្រុលទៅបុកបណ្តាលឲ្យ អ្នកបើកបរម៉ូតូ ប៉ើងខ្ទាតជាច្រើនម៉ែត្រ ធ្លាក់មកវិញស្លាប់ភ្លាមៗ នៅនឹងកន្លែង ហើយរថយន្តបង្ក បានព្យាយាមបើករត់គេច ក៏ជ្រុលទៅបុក ម៉ូតូមួយគ្រឿងទៀត ជាប់ខាងក្រោមរថយន្ត អូសប្រមានជាជិត ៥០០ម៉ែត្រទើប ប៉ុន្តែសំណាងល្អ ម្ចាស់ម៉ូតូរងគ្រោះ លោតចេញពីម៉ូតូរួចផុតពីគ្រោះថ្នាក់។
សមត្ថកិច្ចប៉ុស្តិ៍ចោមចៅ រួមនឹងនគរបាលចរាចរខណ្ឌបានចុះ ទៅដល់ឃាត់ខ្លួន ជនបង្កយកមកកាន់ប៉ុស្តិ៍ ដើម្បីធ្វើការសាកសួរ ។ ប៉ុន្តែអ្វីដែលគួរឲ្យហួសចិត្តនោះ ពេលនគរបាលឃាត់ខ្លួន ជនបង្កទៅដល់ប៉ុស្តិ៍ ដើម្បីសាកសួរបែរជាជនបង្ក សួរនគរបាលវិញ និងជេរប្រមាថនគរបាលប៉ុស្តិ៍ យ៉ាងចាស់ដៃ ដោយសារអំណាច នៃភាពស្រវឹង ជនបង្កបានបញ្ចេញ ចរិតទំនើងទះទាត់តុ នគរបាល ដែលមិនធ្លាប់កើតមានទេ។ សាកសពត្រូវប្រគល់ ទៅឲ្យក្រុមគ្រួសារយកទៅធ្វើបុណ្យតាមប្រពៃណី ចំណែកវត្ថុតាងនិងជន បង្កត្រូវប្រគល់ ទៅឲ្យនគរបាលចរាចរណ៍ជើងគោករាជធានី ចាត់ការបន្តតាមនីតិវិធី៕
Source from: watphnom-news.com
Loading...
Loading...
