អគ្គិភ័យឆាបឆេះផ្ទះ ៣ខ្នងនៅក្រុងបាត់ដំបង ខូចខាតទ្រព្យសម្បត្តិ រាប់ម៉ឺនដុល្លារ
ខេត្តបាត់ដំបង៖អគ្គិភ័យបានឆាបឆេះបំផ្លាញផ្ទះអស់ចំនួន៣ខ្នងកាលពីវេលាម៉ោង៨និង២៥នាទីយប់ថ្ងៃទី២៨ខេត្តបាត់ដំបង ៖ អគ្គិភ័យបានឆាបឆេះ បំផ្លាញផ្ទះអស់ចំនួន ៣ខ្នង កាលពីវេលាម៉ោង ៨និង២៥ នាទីយប់ថ្ងៃទី២៨ ខែធ្នូ ឆ្នាំ២០១៣ នៅចំណុចច្រាំងបាក់ ក្រុមទី១៦ ភូមិវត្តលៀប សង្កាត់ចំការសំរោង ក្រុងបាត់ដំបង បណ្តាលមកពីទុស្សេខ្សែភ្លើង ពេលម្ចាស់ចាក់សោរចោល ទៅធ្វើចំការ ហើយដោយមានកិច្ចអន្តរាគមន៍ទាន់ពេលវេលា ទើបអគ្គិភ័យនេះ មិនបន្តរាលដាល ទៅផ្ទះផ្សេងៗទៀត។
លោក ឡាច ប្រុស នាយការិយាល័យ ស្រាវជ្រាវបទល្មើស អាវុធហត្ថបានអោយដឹងថា តាមការបំភ្លឺពីអ្នជិតខាង នៅកន្លែងកើត គឺអណ្តាលភ្លើងចាប់ផ្តើម ចេញពីផ្ទះ ឈ្មោះ ណាក់ មានឪពុកឈ្មោះ វិបុលសម្បត្តិ ដែលម្ចាស់ចាក់សោរចោល ទៅធ្វើចំការបាត់ ហើយឆេះរាលដាល ទៅផ្ទះអ្នកជិតខាងតែម្តង។ ដោយឡែកលោក គឹម ប៊ុនធឿន នាយការិយាល័យ បង្ការពន្លត់អគ្គីភ័យ និងសង្គ្រោះ បានអោយដឹងថា រូបលោកផ្ទាល់កំពុងឈរ នៅបរិវេណស្នងការ បានឃើញពន្លឺភ្លើង ជះពីត្រើយម្ខាងស្ទឹង ហើយសួរគ្នីគ្នាថា តើភ្លើងអ្វីដែលកំពុងឆេះ។
ពេលនោះមន្ត្រីនគរបាលខ្លះថា ភ្លើងដុតសំរាម មួយរំពេចនោះនៅវេលាម៉ោង ៨និង២០ នាទីក៏មានទូរស័ព្ទថា មានភ្លើងឆេះផ្ទះ នៅភូមិវត្តលៀប ភ្លាមៗនោះសមត្ថកិច្ច បានចេញរថយន្តទៅជួយ អន្តរាគមន៍តែម្តង។ ផ្ទះដែលភ្លើងឆេះខ្លាំង មានចំនួន ៣ខ្នងទី១-ឈ្មោះ វិបុល សម្បត្តិ ភេទប្រុស អាយុ ៤០ឆ្នាំ ជាគ្រូបង្រៀន ផ្ទះមានទំហំ ៩គុណ១០ ម៉ែត្រសង់ពីថ្មក្រោម ឈើលើឆេះអស់ ៩៥ភាគរយនិងទ្រព្យសម្បត្តិទាំងស្រុង ដោយសារម្ចាស់មិននៅ។
ទី២-ឈ្មោះ ផ្លាង ឆន ភេទប្រុស អាយុ ៥៣ឆ្នាំ ជាមន្ត្រីនគរបាល ចរាចរណ៍ផ្លូវគោកខេត្ត នៅជាប់ខាងត្បូងផ្ទះបង្កហេតុ ផ្ទះមានទំហំ ៥គុណ១៦ ម៉ែត្រសង់ពីថ្មក្រោម ឈើលើឆេះផ្ទះអស់ ៩៥ភាគរយគិតជាប្រាក់ ២ម៉ឺនដុល្លារ និងប្រាក់សុទ្ធចំនួន ២ពាន់ដុល្លារ។ ទី៣-ឈ្មោះ អ៊ុក ស៊ីណែត ភេទស្រី អាយុ ៤៨ឆ្នាំ នៅជាប់ខាងជើងផ្ទះបង្កហេតុ សង់ពីថ្មដំបូលប្រក់សង្ក័សី ឆេះផ្ទះអស់ ៥០ភាគរយគិតជាប្រាក់ ២ម៉ឺន៥ ពាន់ដុល្លារមិនខូចសម្ភារៈទេ។ ចំពោះផ្ទះឈ្មោះ គឹម ឌុន ភេទប្រុស អាយុ ៥២ឆ្នាំនៅខាងជើងគេ មានផ្ទះទំហំ ៦គុណ១២ ម៉ែត្រភ្លើងរាល ឆាបឆេះជញ្ជាំងក្តារ ខាងលើអស់ចំនួន ៥ភាគរយ។
តាមសម្តីអ្នកជិតខាងនិងម្ចាស់ផ្ទះ នៅជាប់ផ្ទះកើតហេតុ បានអោយដឹងថា នៅមុនពេលកើតហេតុ គេឃើញក្មួយម្ចាស់ផ្ទះ ឈ្មោះ វិបុល សម្បត្តិ បានមកអង្គុយក្រៅរបងផ្ទះ ក្រោយមកក៏ដុតទៀន ផ្លោះរបងចូល ពួកគាត់មិនយកចិត្តទុកដាក់ ដោយក្មួយរូបនេះ ត្រូវពូបោះបង់ និងកាត់កាលចោល។ លុះដល់ម៉ោង ៨យប់ក៏ឮសំលេងផ្ទុះ ដូចបាញ់កាំជ្រួច ស្មានថា គេបាញ់កាំជ្រួចនៅវត្តលៀប ក៏មិនចាប់អារម្មណ៍។ ប្រហែល ១០នាទីក្រោយមក ក៏ឮសំឡេងស្រែកហៅគ្នា ជួយពន្លត់ ទើបដឹងថាភ្លើងឆេះផ្ទះ ក៏នាំគ្នាទូរស័ព្ទទៅ សមត្ថកិច្ចតែម្តង។ ក្រោយពេលកើតហេតុ បាត់់ខ្លួនក្មួយម្ចាស់ផ្ទះ ទោះជាមានការអះអាងថា ទុស្សេខ្សែភ្លើង ក៏ពួកគាត់តាមរកក្មួយម្ចាស់ផ្ទះ ដើម្បីជជីកសួរឬសគល់ផងដែរ។
លោក គឹម ប៊ុនធឿន នាយការិយាល័យ បង្ការពន្លត់អគ្គីភ័យនិងសង្គ្រោះ បានបញ្ជាក់ថា ករណីភ្លើងឆេះផ្ទះ ៣ខ្នងនេះ មិនអាចវាយតម្លៃ នៃការខូចខាតបានទេ ព្រោះម្ចាស់ផ្ទះឈ្មោះ វិបុល សម្បត្តិ មិនទាន់អាចទំនាក់ទំនងបានទេ ហើយអគ្គិភ័យនេះផ្តើមឡើង ដោយសារទុស្សេខ្សែភ្លើងទូរទឹកកក បណ្តាលអោយទូរនេះ កំពិតរួញ។ ការចុះអន្តរាគមន៍ពន្លត់អគ្គិភ័យ មានរថយន្តចំនួន ៣គ្រឿងចំណាយទឹកបាញ់ចំនួន ៨ដឹកស្មើ ៤៦ម៉ែត្រគីប។ ពេលចុះធ្វើសកម្មភាព ជួបឧបសគ្គផ្លូវតិចតួច ហើយពេលដល់កន្លែងកើតហេតុ ពេលបាញ់ទឹកអស់ពីរថយន្ត មានការលំបាកមិនអាច បញ្ជារថយន្តទៅមុខឬទៅក្រោយ ដោយផ្លូវមាត់ស្ទឹងបាក់ តែទោះជាយ៉ាងណាសមត្ថកិច្ច បានជួយពន្លត់មិនអោយឆេះរាលដាល ដល់ផ្ទះដ៏ទៃទៀត បានទាន់ពេលវេលា៕ ដោយ សុខជា
Source from: watphnom-news.com
No comments:
Post a Comment