កញ្ញា ធី សុវណ្ណថា ព្រមានដឹកនាំការតវ៉ា ប្រសិនបើក្រសួងមហាផ្ទៃ មិនវែកមុខមន្ត្រីលិខិតឆ្លងដែន ដែលធ្វើឲ្យលេចធ្លាយឯកសារផ្ទាល់ខ្លួន
រាជធានីភ្នំពេញ៖កញ្ញាធីសុវណ្ណថាសកម្មជនរិះគន់រដ្ឋាភិបាលឥតសំចៃមាត់ដែលអះអាងថារាជធានីភ្នំពេញ ៖ កញ្ញា ធី សុវណ្ណថា សកម្មជនរិះគន់រដ្ឋាភិបាល ឥតសំចៃមាត់ ដែលអះអាងថា ពាក្យសុំធ្វើលិខិតឆ្លងដែនរបស់នាង ត្រូវមន្ត្រីនគរបាល ក្នុងនាយកដ្ឋាន លិខិតឆ្លងដែនធ្វើឲ្យលេចធ្លាយ បានព្រមានដឹកនាំការតវ៉ា នៅខាងមុខក្រសួងមហាផ្ទៃ និងភូមិគ្រឹះរបស់សម្តេច ហ៊ុន សែន ក្នុងរាជធានីភ្នំពេញ ប្រសិនបើអាជ្ញាធរ មិនព្រមដោះស្រាយ រកយុត្តិធម៌ឲ្យនាងទេនោះ។
កញ្ញា ធី សុវណ្ណថា អាយុ ១៩ឆ្នាំ បានបង្កើតទំព័រហ្វេសប៊ុក ដោយមានអ្នកគាំទ្រជាង១៨៨.០០០ នាក់ កំពុងតែទាមទារឲ្យ រដ្ឋមន្ត្រីក្រសួងមហាផ្ទៃ ចេញបទបញ្ជាដើម្បីធ្វើការស៊ើបអង្កេត ស្វែងរកជនដែលធ្វើឲ្យ លេចធ្លាយឯកសារស្នើសុំ លិខិតឆ្លងដែន ហើយចាត់វិធានការ ដើម្បីការពារសុវត្ថិភាព របស់នាងនិងគ្រួសារ បន្ទាប់ពីជីវិតរបស់នាងត្រូវ គេគំរាមកំហែង។ នាងបាននិយាយថា “ កាលពីថ្ងៃពុធ ខ្ញុំបានប្តឹងទៅលោក ស ខេង រដ្ឋមន្ត្រីក្រសួងមហាផ្ទៃ តាមរយៈ ទំព័រហ្វេសប៊ុករបស់ខ្ញុំ ដើម្បីស្វែងរកជន ដែលធ្វើឲ្យពាក្យសុំធ្វើលិខិតឆ្លងដែន របស់ខ្ញុំលេចធ្លាយ”។
ប្រសិនបើក្រសួងមហាផ្ទៃ មិនចាត់វិធានការទេ កញ្ញា ធី សុវណ្ណថា បានបញ្ជាក់ថា នាងនឹងដាក់ពាក្យប្តឹង ជាផ្លូវការទៅកាន់ រដ្ឋមន្ត្រីក្រសួងមហាផ្ទៃ ។ ហើយប្រសិនបើ ការប្តឹងនេះនៅតែមិនបានការ នាងនឹងដាក់ញត្តិ ទៅស្ថានទូតនានា និងអង្គការសង្គមស៊ីវិល នៅបួនថ្ងៃក្រោយ ដើម្បីធានាឲ្យបានថា គ្មានគេមករុកគួននាង។ ប្រសិនបើវិធីចុងក្រោយនេះ នៅតែមិនបានការទៀត នាងនឹងធ្វើការតវ៉ា នៅខាងមុខ ក្រសួងមហាផ្ទៃ នៅបួនថ្ងៃក្រោយ ហើយបួនថ្ងៃបន្ទាប់មកទៀត នាងនឹងធ្វើការតវ៉ានៅភូមិគ្រឹះ របស់សម្តេច ហ៊ុន សែន ក្បែរវិមានឯករាជ្យ។
ក្រុមមន្ត្រីបានដាក់ការសង្ស័យថា ពាក្យសុំធ្វើលិខិតឆ្លងដែន ដែលលេចធ្លាយនេះ ប្រហែលជាចេញមកពី មន្ត្រីក្រសួងមហាផ្ទៃ។ កញ្ញា ធី សុវណ្ណថា ក៏បានសន្និដ្ឋានថា “ មានតែមន្ត្រីលិខិតឆ្លងដែនប៉ុណ្ណោះ ដែលកាន់កាប់ ឯកសារនេះ ហេតុដូច្នេះហើយ វាបង្ហាញថា ជនដែលធ្វើឲ្យលេចធ្លាយ ឯកសារនេះ ប្រាកដជាចេញមកពី នាយកដ្ឋានលិខិតឆ្លងដែន ដែលស្ថិតក្រោមក្រសួងមហាផ្ទៃ”។ ពាក្យសុំធ្វើលិខិតឆ្លងដែន របស់កញ្ញា ធី សុវណ្ណថា ដែលលេចធ្លាយនោះ ចុះកាលបរិច្ឆេទ នៅថ្ងៃទី៦ខែ មករា គឺត្រូវបានចុះហត្ថលេខា ដោយវរសេនីយ៍ត្រី កៅ កុលវុទ្ធ និង អនុសេនីយ៍ត្រី ថាន កន្ធុល។
លោក អំ សំអាត អ្នកគ្រប់គ្រងបច្ចេកទេស នៅអង្គការសិទ្ធិមនុស្ស លីកាដូ បានលើកឡើងថា វាអាស្រ័យលើរដ្ឋាភិបាល ដែលធានាថា ឯកសាររបស់ បុគ្គលឯកជន មិនត្រូវបង្ហាញជាសាធារណៈនោះ ហើយវាជារឿងមួយ មានសារៈសំខាន់ណាស់ ដែលត្រូវធ្វើការស៊ើបអង្កេត ឲ្យបានហ្មត់ចត់ ដើម្បីស្វែងរកជន ដែលធ្វើឲ្យលេចធ្លាយឯកសារនេះ ព្រោះវាអាចធ្វើឲ្យកញ្ញា ធី សុវណ្ណថា ជួបហានិភ័យ ខ្ពស់នៃការវាយប្រហារ បន្ទាប់ពីអាសយដ្ឋាន និងសាច់ញាតិរបស់នាង ត្រូវបានបង្ហាញ ជាសាធារណៈ៕
Source from: watphnom-news.com
No comments:
Post a Comment