រាស្ត្រគ្មានជំនឿលើការរៀបចំវេទិកាសាធារណៈរបស់មន្ត្រីក្រោមឱវាទបុរសខ្លាំង ខណៈដែលបុរសខ្លាំងមិនប្រារព្ធសមាជជាតិ
សមាជជាតិដែលមានចែងក្នុងមាត្រា១៤៧ថ្មី(មាត្រា១២៨ចាស់) មាត្រា១៤៨ថ្មី(មាត្រា១២៩ចាស់) និងមាត្រា១៤៩ថ្មី នៃរដ្ឋធម្មនុញ្ញនៃព្រះរាជាណាចក្រកម្ពុជាឆ្នាំ១៩៩៣ ដើម្បីបើកឲ្យប្រជារាស្ត្រជ្រាបដោយផ្ទាល់អំពីកិច្ចការផ្សេងៗដែលជាប្រយោជន៍ជាតិ និងលើកបញ្ហា និងសំណូមពរជូនរដ្ឋអំណាចដោះស្រាយនោះ ត្រូវបានគណបក្សប្រជាជនកម្ពុជានិងសម្តេចអគ្គមហាសេនាបតីតេជោ ហ៊ុន សែន ហៅបុរសខ្លាំងជានាយករដ្ឋមន្ត្រី ព្យាយាមគេចវេះមិនរៀបចំឲ្យមានដំណើរការស្របតាមរដ្ឋធម្មនុញ្ញដែលជាច្បាប់កំពូលនៃព្រះរាជាណាចក្រកម្ពុជាអស់រយៈពេលជាង២០ឆ្នាំមកហើយ ។
ស្របពេលដែលបុរសខ្លាំង ក៏ដូចជាគណបក្សប្រជាជនកម្ពុជា ដែលជាគណបក្សនយោបាយកាន់អំណាចដុះស្លែនៅកម្ពុជា មិនរវីរវល់រៀបចំឲ្យមានសមាជជាតិដូចមានចែងក្នុងរដ្ឋធម្មនុញ្ញនោះ បែរជាបុរសខ្លាំងរៀបចំឲ្យមានវេទិកាសាធារណៈនៅតាមមូលដ្ឋានទៅវិញ តាមរយៈក្រុមការងារចុះបំពេញបេសកកម្មតាមមូលដ្ឋាន ដើម្បីត្រួតពិនិត្យ និងគាំទ្រការអនុវត្តកម្មវិធីនយោបាយ និងយុទ្ធសាស្ត្រចតុកោណដំណាក់កាលទី៣របស់រាជរដ្ឋាភិបាលកម្ពុជា ដឹកនាំដោយមន្ត្រីក្រោមឱវាទរបស់បុរសខ្លាំង ។
អនុលោមតាមការបញ្ញត្តិរបស់រដ្ឋធម្មនុញ្ញនៃព្រះរាជាណាចក្រកម្ពុជា ស្តីអំពីសមាជជាតិ គឺសមាជជាតិបើកឲ្យប្រជារាស្ត្រជ្រាបដោយផ្ទាល់អំពីកិច្ចការផ្សេងៗ ដែលជាប្រយោជន៍ជាតិ និងលើកបញ្ហា និងសំណូមពរជូនរដ្ឋអំណាចដោះស្រាយ ។ ប្រជារាស្ត្រខ្មែរទាំងពីរភេទមានសិទ្ធិទៅចូលរួមក្នុងសមាជជាតិ ។ សមាជជាតិប្រជុំមួយដងក្នុងមួយឆ្នាំនៅដើមខែធ្នូ តាមការកោះអញ្ជើញរបស់នាយករដ្ឋមន្ត្រី ។ សមាជជាតិប្រព្រឹត្តទៅក្រោមព្រះរាជាធិបតីភាពនៃព្រះមហាក្សត្រ ។ សមាជជាតិអនុម័តសំណូមពរជូនព្រឹទ្ធសភា ជូនរដ្ឋសភា និងជូនរដ្ឋអំណាចពិចារណា ។ ការរៀបចំ និងការប្រព្រឹត្តទៅនៃសមាជជាតិនឹងត្រូវកំណត់ក្នុងច្បាប់មួយ ។
ផ្ទុយទៅវិញ ខណៈដែលបុរសខ្លាំងមិនរៀបចំឲ្យមានសមាជជាតិនោះ ដោយយោងតាមកម្មវិធីនយោបាយ និងយុទ្ធសាស្ត្រចតុកោណដំណាក់កាលទី៣របស់រាជរដ្ឋាភិបាលសម្រាប់នីតិកាលទី៥នៃរដ្ឋសភា និងយោងតាមការចាំបាច់របស់រាជរដ្ឋាភិបាល គឺបុរសខ្លាំងបានបង្កើតក្រុមការងារថ្នាក់ជាតិចុះមូលដ្ឋាន ដើម្បីត្រួតពិនិត្យ និងគាំទ្រការអនុវត្តកម្មវិធីនយោបាយ និងយុទ្ធសាស្ត្រចតុកោណដំណាក់កាលទី៣របស់រាជរដ្ឋាភិបាលនៅតាមបណ្តាខេត្ត និងរាជធានី មានសមាសភាពដឹកនាំមកពីមន្ត្រីក្រោមឱវាទរបស់បុរសខ្លាំងទាំងអស់ ហើយដែលត្រូវអនុវត្តតួនាទី ភារកិច្ច និងរបៀបរបបការងារតាមសេចក្តីណែនាំរបស់រាជរដ្ឋាភិបាលលេខ០១សណន ចុះថ្ងៃទី២៧ ខែមករា ឆ្នាំ២០១៤ ។
ដោយការរៀបចំវេទិកាសាធារណៈនៅតាមមូលដ្ឋានដើម្បីស្តាប់សំណូមពរ និងសំណើរបស់ប្រជាពលរដ្ឋពីសំណាក់ក្រុមការងារជាមន្ត្រីក្រោមឱវាទរបស់បុរសខ្លាំង និងជាមន្ត្រីភាគច្រើនដែលធ្លាប់បង្កបញ្ហាជាមួយប្រជាពលរដ្ឋថែមទៀតនោះ គឺប្រជារាស្ត្រគ្មានជំនឿទាល់តែសោះដែលថា សំណូមពរ និងសំណើរបស់ពួកគាត់ត្រូវបានដោះស្រាយប្រកបដោយប្រសិទ្ធភាព គ្មានការរើសអើង ដែលប្រាសចាកពីការធ្វើសមាជជាតិទាំងស្រុង ។
មជ្ឈដ្ឋានអ្នកច្បាប់ឯករាជ្យនិងអ្នកតាមដានស្ថានការណ៍នយោបាយនៅកម្ពុជា បានលើកឡើងថា ការណ៍ដែលគណបក្សប្រជាជនកម្ពុជា ជាពិសេសបុរសខ្លាំង មិនរៀបចំឲ្យមានសមាជជាតិអស់រយៈពេលជាង២០ឆ្នាំកន្លងមក គឺជាព័ស្តុតាងមួយបង្ហាញថា ជាការមិនគោរពប្រតិបត្តិ និងរំលោភបំពានលើរដ្ឋធម្មនុញ្ញជាច្បាប់កំពូលនៃព្រះរាជាណាចក្រកម្ពុជា និងក៏បានបង្ហាញឲ្យឃើញដែរថា បុរសខ្លាំងជាជនកំសាក គ្មានសេចក្តីក្លាហានចេញមុខប្រឈមទៅនឹងការចោទសួរ ដេញដោលពីសំណាក់ប្រជាពលរដ្ឋជាម្ចាស់ឆ្នោត ក្រោមព្រះរាជាធិបតីភាពនៃព្រះមហាក្សត្រ ហើយបែរជាចូលចិត្តទទួលយកនូវរបាយការណ៍ភូតភរពីមន្ត្រីក្រោមឱវាទមួយចំនួន ឬភាគច្រើន ដើម្បីសង្កត់កដាក់បន្ទុកលើប្រជារាស្ត្រទៅវិញ ៕
Source from: www.dtn7.com
No comments:
Post a Comment