ផលិតកម្ម Rock ត្រៀមដាក់បញ្ចាំងរឿងភាគ ” ទឹកចិត្តប្រពន្ធ ” បង្ហាញពីជីវិតជាប្រពន្ធចុង
រាជធានីភ្នំពេញ៖កាលពីថ្ងៃទី៣០ខែឧសភាឆ្នាំ២០១៤ផលិតកម្មRockជាផលិតកម្មទទួលការពេញនិយមរាជធានីភ្នំពេញ ៖ កាលពីថ្ងៃទី ៣០ ខែឧសភា ឆ្នាំ២០១៤ ផលិតកម្ម Rock ជាផលិតកម្មទទួលការពេញនិយម ក្នុងការផលិតរឿងភាគ ដាក់បញ្ចាំង នៅក្នុងស្ថានីយទូរទស្សន៍ និងរឿងខ្នាតធំ បញ្ចាំងតាមរោងភាពយន្ត បានរៀបចំពិធីក្រុងពាលីនិងបើកសន្នីសិទ បង្ហាញភាពយន្ដថ្មី នៅក្នុងរ៉ក់កាហ្វេ ដែលមានទីតាំង ក្នុងមជ្ឈមណ្ឌលកម្សាន្តរ៉ក់ ដោយរឿងថ្មីនេះ មានចំណងជើងថា "ទឹកចិត្តប្រពន្ធ" ជាប្រភេទរឿង មនោសញ្ចេតនាជ្រាលជ្រៅ មានចំនួន ៥០ភាគ ត្រៀមបញ្ចាំងក្នុង ស្ថានីយទូរទស្សន៍ CTN គ្រោងនឹងចាយដើមទុន ប្រមាណជាង ១០ម៉ឺនដុល្លារ ព្រមទាំងការធ្វើដំណើរ ទៅថតផ្តិតយករូបភាព ដល់ប្រទេសម៉ាឡេស៊ី ។
ខ្សែភាពយន្ដភាគរឿង "ទឹកចិត្តប្រពន្ធ" ត្រូវបានរៀបចំឡើង យ៉ាងសម្រិតសម្រាំង បំពេញតាមសេចក្ដីត្រូវការ និងទីផ្សារភាពយន្ដ ក្នុងប្រទេសកម្ពុជា ឆ្លុះបញ្ចាំង ពីតថភាពរស់នៅ របស់សង្គមមនុស្សបច្ចុប្បន្ន និងការតស៊ូក្នុងជីវិតស្នេហា មានទាំងរសជាតិជីវិត ឋានៈជាប្រពន្ធចុង កូនចុង កូនដើម និងមហិច្ឆតាលោភលន់ របស់មនុស្ស និងឈុតឆាកប្លែកៗជាច្រើនទៀត ។
លោក យឹម សុសត្យា ប្រធានគ្រប់គ្រងផលិតកម្ម រ៉ក់ និងជាជំនួយការ លោកឧកញ៉ា គិត ធាង បានថ្លែងឲ្យដឹងថា ផលិតកម្ម រ៉ក់ តែងតែពាំនាំ និងផលិតនូវខ្សែភាពយន្ត មានគុណភាពខ្ពស់ ជាពិសេស គឺភាពយន្ដខ្មែរ ដាក់បញ្ចាំងនៅស្ថានីយទូរទស្សន៍ ព្រមទាំងភាពយន្ដខ្នាតធំ ដូចជារឿង "ពូជខ្ញុំអ៊ីចឹង, អស់ទាស់ហ្មងទីតា" និងរឿងដែលចាក់បញ្ចាំង កន្លងមកជាច្រើន ឃើញថា ទទួលបានជោគជ័យ និងការគាំទ្រ ។ ស្របពេលជាមួយ នឹងការថតរឿង "ទឹកចិត្តប្រពន្ធ" បច្ចុប្បន្ន ផលិតកម្ម រ៉ក់ កំពុងតែ ថតរឿងខ្នាតធំ មួយទៀត ដែលមានជនជាតិអូស្ដ្រាលី ជាអ្នកនិពន្ធ និងដឹកនាំរឿង ដោយថវិកា ដែលត្រូវចំណាយ គឺមិនក្រោមកន្លះ លានដុល្លារនោះទេ ។
លោកបន្ដទៀតថា ដោយឡែករឿង "ទឹកចិត្តប្រពន្ធ" អាចត្រូវចំណាយទុន ប្រមាណជាង ១០ម៉ឺនដុល្លារ លើការចំណាយគ្រប់បែបយ៉ាង រួមទាំងការទៅថត នៅក្រៅប្រទេសផងដែរ ។ ផលិតកម្ម រ៉ក់ គឺជាផលិតកម្មកំពុង តែមមាញឹក ក្នុងការថតខ្សែភាពយន្ដជាច្រើន ហើយក្នុងនាមលោក ឧកញ៉ា គិត ធាង ជាអគ្គនាយក លោកតែងតែផ្ដួចផ្ដើម និងផ្ដល់អនុសាសន៍ល្អៗជាច្រើន ក្នុងន័យលើកស្ទួយ វិស័យខ្សែភាពយន្ដខ្មែរ ឲ្យមានភាពរីកចម្រើនឡើង ។ ជាក់ស្ដែងក្នុងថ្ងៃនេះ មានរូបលោក និងអ្នកនិពន្ធ តារាសម្ដែងជាច្រើនដួង កំពុងសម្ពោធរឿងថ្មី ត្រៀមទៅថត នៅក្រៅប្រទេស អាចបង្ហាញឲ្យឃើញថា ផលិតកម្មរ៉ក់ មិនត្រឹមតែពង្រីកវិសាលភាព ភាពយន្ដរបស់ខ្លួនទេ សូម្បីតែគុណភាព និងទិដ្ឋភាពនៃរឿង ក៏យើងត្រូវយកចិត្តទុកដាក់ ឲ្យបានល្អប្រសើរ ផងដែរ ។
ចំណែក លោក អ៊ិន សុភិន អ្នកនិពន្ធរឿង បានថ្លែងឲ្យដឹងពីដំណើររឿងថា "ទឹកចិត្តប្រពន្ធ" ជាខ្សែភាពយន្តបែប មនោសញ្ចេនា កំសត់សោកសង្រែង របស់ភរិយា ជាប្រពន្ធចុង ដែលត្រូវកូនខាងប្តី ព្យាយាមធ្វើបាប ខណៈដែលពួកគេ ជាកូនៗ មានគំនិតថា ឲ្យតែម្តាយចុង សុទ្ធតែជាស្ត្រីមិនល្អ តែងតែធ្វើបាបកូនចុង បើទោះជាម្តាយចុង ខំព្យាយាមធ្វើអំពើល្អ ប្រតិបត្តិអំពើល្អចំពោះស្វាមី ដែលជាឪពុក របស់ខ្លួនយ៉ាងណាក្តី។ ប៉ុន្តែបែរជាគេយល់ថា ម្តាយចុងនោះ កំពុងបញ្ចេញឫកពារ មាយាទផ្គាប់ចិត្តប្តី ឲ្យខឹងកូនប៉ុណ្ណោះ។
លោកបន្តថា ទោះជាយ៉ាងណាក្តី ខ្សែភាពយន្តរឿង "ទឹកចិត្តប្រពន្ធ" នេះបានឆ្លុះបញ្ចាំង ពីមាតាចុង ឬ ហៅថា ភរិយាក្រោយ ចំនួន៣រូប ដែលមានពីររូប ជាប្រពន្ធចុងចិត្តធម៌ ខំប្រព្រឹត្តិខ្លួន ជាមាតាគំរូ ឬជាម្លប់ដ៏ត្រជាក់ ដល់កូនៗ ខណៈមាតាជាប្រពន្ធចុងមួយរូបទៀត តែងតែធ្វើខ្លួន មិនសមរម្យ និងជាមនុស្សលោភលន់ ចង់បានតែទ្រព្យសម្បត្តិខាងប្តី ដើម្បីសោយសុខប៉ុណ្ណោះ៕
Source from: watphnom-news.com
No comments:
Post a Comment