កត្តាអ្វីខ្លះដែលធ្វើឲ្យឯកឧត្តម ជីវ កេង ក្លាយជាចៅក្រមដ៏មានឥទ្ធិពលបំផុតក្នុងស្ថាប័នតុលាការកម្ពុជា ?
កាលនៅបម្រើការងារជាចៅក្រមតុលាការកំពូល លោក ជីវ កេង មិនទាន់ល្បីឈ្មោះនៅឡើយទេ ។ លុះមកដល់ចុងឆ្នាំ២០០៥ លោកចៅក្រម ជីវ កេង ត្រូវបានតែងតាំងជាប្រធានសាលាដំបូងរាជធានីភ្នំពេញ (អតីតតុលាការក្រុងភ្នំពេញ) ដោយព្រះរាជក្រឹត្យលេខនស/រកត/១០០៥/៤១៧ ចុះថ្ងៃទី០៧ ខែតុលា ឆ្នាំ២០០៥ គឺលោកចៅក្រម ជីវ កេង ចាប់ផ្តើមមានឱកាសប្រមូលលុយដាក់ហោប៉ៅក្នុងនាមជាប្រធានសាលាដំបូងរាជធានីភ្នំពេញ ប៉ុន្តែក៏មិនទាន់មានអំណាចខ្លាំងនៅឡើយដែរ និងម្យ៉ាងមិនទាន់មានងារត្រូវគេហៅថា "ឯកឧត្តម" ថែមទៀតផង ។
កាន់តំណែងជាប្រធានសាលាដំបូងរាជធានីភ្នំពេញបានរយៈពេលជិត២ឆ្នាំ លោកចៅក្រម ជីវ កេង ត្រូវបានតែងតាំងជាសមាជិកឧត្តមក្រុមប្រឹក្សានៃអង្គចៅក្រម (ក្រោមរូបភាពចាត់តាំង) ដោយព្រះរាជក្រឹត្យលេខនស/រកត/០៨០៧/៣៤០ ចុះថ្ងៃទី០៩ ខែសីហា ឆ្នាំ២០០៧ ប៉ុន្តែលោកចៅក្រមរូបនេះត្រូវបានគេហៅថា "លោកចៅក្រម"នៅឡើយ មិនទាន់ត្រូវបានគេហៅថា"ឯកឧត្តម"ទេ គ្រាន់តែចាប់ផ្តើមមានអំណាចក្នុងឧត្តមក្រុមប្រឹក្សានៃអង្គចៅក្រមហើយ ក្នុងនាមជាសមាជិកឧត្តមក្រុមប្រឹក្សានៃអង្គចៅក្រម ទោះបីឋិតក្រោមរូបភាព"ចាត់តាំង"ក៏ដោយ ។
ក្រោយមក លោកចៅក្រម ជីវ កេង ទទួលបានការតែងតាំងជាទីប្រឹក្សាឯកឧត្តមបណ្ឌិតសភាចារ្យ សុខ អាន ជាប្រធានក្រុមប្រឹក្សាអ្នកច្បាប់នៃទីស្តីការគណៈរដ្ឋមន្ត្រី មានឋានៈស្មើរដ្ឋលេខាធិការបន្ថែមលើមុខងារបច្ចុប្បន្ន ដោយព្រះរាជក្រឹត្យលេខនស/រកត/០៤០៨/៣៧១ ចុះថ្ងៃទី០៣ ខែមេសា ឆ្នាំ២០០៨ ពោលគឺលោកចៅក្រម ជីវ កេង គេចាប់ផ្តើមហៅថា "ឯកឧត្តម" ហើយ ក្នុងនាមជាទីប្រឹក្សាឯកឧត្តមបណ្ឌិតសភាចារ្យ សុខ អាន ។ តំណែងជាទីប្រឹក្សាប្រធានក្រុមប្រឹក្សាអ្នកច្បាប់នៃទីស្តីការគណៈរដ្ឋមន្ត្រីរបស់ឯកឧត្តមចៅក្រម ជីវ កេង ត្រូវបានតែងតាំងសាជាថ្មីទៀតមានឋានៈស្មើរដ្ឋមន្ត្រីបន្ថែមលើមុខងារបច្ចុប្បន្ន ដោយព្រះរាជក្រឹត្យលេខនស/រកត/០៥០៩/៥៧១ ចុះថ្ងៃទី២៧ ខែឧសភា ឆ្នាំ២០០៩ ។
តមកទៀត ឯកឧត្តមចៅក្រម ជីវ កេង ត្រូវបានតែងតាំងជាសមាជិកក្រុមប្រឹក្សាជាតិប្រឆាំងអំពើពុករលួយ មានឋានៈស្មើរដ្ឋមន្ត្រី ដោយព្រះរាជក្រឹត្យលេខនស/រកត/០៦១០/៤៩៩ ចុះថ្ងៃទី១២ ខែមិថុនា ឆ្នាំ២០១០ ។ លើសពីនេះ ឯកឧត្តមចៅក្រម ជីវ កេង ក៏ត្រូវបានតែងតាំងជាប្រធានអង្គភាពអធិការកិច្ចនៃក្រុមប្រឹក្សាវិន័យនៃឧត្តមក្រុមប្រឹក្សានៃអង្គចៅក្រម ហៅកាត់ថា "អ.ក.វ" ដោយអនុក្រឹត្យរបស់រាជរដ្ឋាភិបាលលេខ១៤៤អនក្រ.បក ចុះថ្ងៃទី១១ ខែកញ្ញា ឆ្នាំ២០១២ ។
ការទទួលបានមុខតំណែងចំនួន២ចុងក្រោយនេះ (ជាសមាជិកក្រុមប្រឹក្សាជាតិប្រឆាំងអំពើពុករលួយ និងជាប្រធាន អ.ក.វ) គឺឯកឧត្តមចៅក្រម ជីវ កេង ក្តោបក្តាប់បាននូវអំណាចយ៉ាងខ្លាំងក្លានៅក្នុងស្ថាប័នតុលាការកម្ពុជាគ្រប់ជាន់ថ្នាក់សឹងតែចៅក្រមរូបណាក៏ដោយ ក៏ត្រូវញញើតនឹងអំណាចរបស់ឯកឧត្តមចៅក្រម ជីវ កេង ដែរ ។
បច្ចុប្បន្ន ឯកឧត្តមចៅក្រម ជីវ កេង បន្ទាប់ពីកាន់កាប់មុខតំណែងជាប្រធានសាលាដំបូងរាជធានីភ្នំពេញអស់រយៈពេលជិត១០ឆ្នាំមកហើយនោះ ត្រូវបានតែងតាំងតំណែងថ្មីជាអនុប្រធានតុលាការកំពូល ដោយព្រះរាជក្រឹត្យលេខនស/រកត/០៤១៤/៤៤៨ ចុះថ្ងៃទី០៩ ខែមេសា ឆ្នាំ២០១៤ ខណៈដែលតួនាទី និងតំណែងដ៏សំខាន់ៗមួយចំនួនទៀតរបស់ឯកឧត្តមរូបនេះ ដូចជាសមាជិកឧត្តមក្រុមប្រឹក្សានៃអង្គចៅក្រមមានរយៈពេលជិត៧ឆ្នាំ និងជាសមាជិកក្រុមប្រឹក្សាជាតិប្រឆាំងអំពើពុករលួយ…នៅតែរក្សាតាមជាប់ខ្លួនដដែល ។
ដូច្នេះ កត្តាដែលធ្វើឲ្យឯកឧត្តម ជីវ កេង ក្លាយជាចៅក្រមមានទ្រព្យសម្បត្តិមហាសាល និងមានឥទ្ធិពលខ្លាំងបំផុតនៅក្នុងស្ថាប័នតុលាការកម្ពុជានោះ គឺ ៖
ក/ជាទីប្រឹក្សាឯកឧត្តម បណ្ឌិតសភាចារ្យ សុខ អាន ទើបត្រូវបានគេហៅថា "ឯកឧត្តម" តាំងពីនៅកាន់តំណែងជាប្រធានសាលាដំបូងរាជធានីភ្នំពេញមកម្ល៉េះ ។ លើសពីនេះ ទំនងជាសម្អាងថាខ្លួនជាទីប្រឹក្សាឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានក្រុមប្រឹក្សាអ្នកច្បាប់នៃទីស្តីការគណៈរដ្ឋមន្ត្រី ទើបឯកឧត្តមចៅក្រម ជីវ កេង នាពេលកន្លងមកបានជិះរថយន្តទំនើបម៉ាក Range Rover ពាក់ស្លាកលេខ រដ្ឋ០៥.២-៩៥៩៥ ជាប្រភេទយានយន្តសម្រាប់ប្រើប្រាស់នៅទីស្តីការគណៈរដ្ឋមន្ត្រីនៃស្ថាប័ននីតិប្រតិបត្តិយ៉ាងហ៊ឺហា ភ្លេចគិតខ្លួនឯងជាចៅក្រមបម្រើការងារនៅក្នុងស្ថាប័នតុលាការ ។
ខ/ជាសមាជិកឧត្តមក្រុមប្រឹក្សានៃអង្គចៅក្រម និងជាប្រធាន អ.ក.វ មានសិទ្ធិពេញទីក្នុងការត្រួតពិនិត្យតាមដាន និងដាក់វិន័យទៅលើបណ្តាចៅក្រមទាំងឡាយក្នុងស្ថាប័នតុលាការ ។
គ/ជាប្រធានសាលាដំបូងរាជធានីភ្នំពេញ ដែលជាចៅក្រមជម្រះក្តីផង និងជាសមាជិកក្រុមប្រឹក្សាជាតិប្រឆាំងអំពើពុករលួយផង រឹងរឹតតែធ្វើឲ្យបណ្តាចៅក្រមទាំងឡាយក្នុងស្ថាប័នតុលាការខ្លបខ្លាចអំណាចឯកឧត្តមចៅក្រម ជីវ កេង ថែមទៀត ដ្បិតឯកឧត្តមចៅក្រមរូបនេះបានពាក់អាវក្នុងស្ថាប័នប្រឆាំងអំពើពុករលួយ គឺអាចចាត់ការទៅលើចៅក្រមណាដែលមិនដង្ហែខ្លួនបាន ។
ឯកឧត្តមចៅក្រម ជីវ កេង អាយុ៦៣ឆ្នាំ ទទួលបានសញ្ញាបត្របណ្ឌិតពីសាកលវិទ្យាល័យចំរើនពហុបច្ចេកវិទ្យា (CUP) ដែលត្រូវដល់អាយុចូលនិវត្តន៍នោះ ត្រូវបានអនុញ្ញាតឲ្យនៅបន្តបម្រើការងារតទៅទៀត និងទំនងជាលែងឲ្យចូលនិវត្តន៍តែម្តងចំនួន២ដងរួចមកហើយ ដោយព្រះរាជក្រឹត្យលេខនស/រកត/០៧១១/៦៩៤ ចុះថ្ងៃទី២៥ ខែកក្កដា ឆ្នាំ២០១១ និងព្រះរាជក្រឹត្យលេខនស/រកត/០៤១៤/៤៤៧ ចុះថ្ងៃទី០៩ ខែមេសា ឆ្នាំ២០១៤ ។
រយៈពេលជិត១០ឆ្នាំកន្លងមក ឯកឧត្តមចៅក្រម បណ្ឌិត(ខាប់) ជីវ កេង បានកាន់កាប់មុខតំណែង និងតួនាទី ភារកិច្ច ដ៏ច្រើនសំពីងសំពោងដូចខាងក្រោម ៖
១-ជាប្រធានសាលាដំបូងរាជធានីភ្នំពេញ (តែងតាំងដោយព្រះរាជក្រឹត្យលេខនស/រកត/១០០៥/៤១៧ ចុះថ្ងៃទី០៧ ខែតុលា ឆ្នាំ២០០៥) មានរយៈពេលជិត១០ឆ្នាំមកហើយ មិនដែលផ្លាស់ប្តូរប៉ុស្តិ៍ម្តងណាសោះ ។
២-ជាសមាជិកឧត្តមក្រុមប្រឹក្សានៃអង្គចៅក្រម ក្រោមរូបភាពចាត់តាំង (តែងតាំងដោយព្រះរាជក្រឹត្យលេខនស/រកត/០៨០៧/៣៤០ ចុះថ្ងៃទី០៩ ខែសីហា ឆ្នាំ២០០៧) មានរយៈពេលជិត៧ឆ្នាំមកហើយ ។
៣-ជាទីប្រឹក្សាឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានក្រុមប្រឹក្សាអ្នកច្បាប់នៃទីស្តីការគណៈរដ្ឋមន្ត្រី មានឋានៈស្មើរដ្ឋមន្ត្រី (តែងតាំងសាជាថ្មីដោយព្រះរាជក្រឹត្យលេខនស/រកត/០៥០៩/៥៧១ ចុះថ្ងៃទី២៧ ខែឧសភា ឆ្នាំ២០០៩) ។
៤-ជាសមាជិកក្រុមប្រឹក្សាជាតិប្រឆាំងអំពើពុករលួយ មានឋានៈស្មើរដ្ឋមន្ត្រី (តែងតាំងដោយព្រះរាជក្រឹត្យលេខនស/រកត/០៦១០/៤៩៩ ចុះថ្ងៃទី១២ ខែមិថុនា ឆ្នាំ២០១០) ។
៥-ជាសមាជិកក្រុមប្រឹក្សាកំណែទម្រង់ច្បាប់និងប្រព័ន្ធយុត្តិធម៌ (តែងតាំងដោយព្រះរាជក្រឹត្យលេខនស/រកត/០៨០៩/៧៦៩ ចុះថ្ងៃទី០១ ខែសីហា ឆ្នាំ២០០៩) ។
៦-ជាសមាជិកក្រុមប្រឹក្សាភិបាលនៃរាជបណ្ឌិត្យសភាវិជ្ជាជីវៈតុលាការ (តែងតាំងដោយអនុក្រឹត្យលេខ៩១អនក្រ.តត ចុះថ្ងៃទី២៧ ខែមករា ឆ្នាំ២០០៩) ។
៧-ជាប្រធានអង្គភាពអធិការកិច្ចនៃក្រុមប្រឹក្សាវិន័យនៃឧត្តមក្រុមប្រឹក្សានៃអង្គចៅក្រម (តែងតាំងដោយអនុក្រឹត្យលេខ១៤៤អនក្រ.បក ចុះថ្ងៃទី១១ ខែកញ្ញា ឆ្នាំ២០១២) ។
៨-ជាសមាជិកគណៈមេធាវីនៃព្រះរាជាណាចក្រកម្ពុជា មានអត្តលេខ៨៤៨ (ធ្វើសច្ចាប្រណិធានចូលប្រកបវិជ្ជាជីវៈមេធាវីនាថ្ងៃទី០៨ ខែតុលា ឆ្នាំ២០១២) ។
យោងតាមរបាយការណ៍លេខពិសេសចុះថ្ងៃទី៣០ ខែមេសា ឆ្នាំ២០១៤ របស់បញ្ជាការដ្ឋានអង្គរក្ស ដឹងឮដោយមេទាហានជាច្រើននាក់ដែលបានធ្វើរបាយការណ៍គោរពរាយការណ៍ជូនសម្តេចអគ្គមហាសេនាបតីតេជោ នាយឧត្តមសេនីយ៍ផុតលេខផ្កាយមាស៥ ហ៊ុន សែន ហៅបុរសខ្លាំង ជានាយករដ្ឋមន្ត្រីនៃព្រះរាជាណាចក្រកម្ពុជា ក៏បានរំលេចឲ្យឃើញដែរថា ជនណាដែលស្និទ្ធស្នាលជាមួយឯកឧត្តម ជីវ កេង គឺនឹងមានឥទ្ធិពលយ៉ាងខ្លាំងនៅក្នុងស្ថាប័នតុលាការកម្ពុជា ហើយបើមានរឿងក្តីក្តាំប្តឹងផ្តល់គ្នា នឹងមិនបរាជ័យឡើយ ៕
Source from: www.dtn7.com
No comments:
Post a Comment