អក្សរខ្មែរបាត់តម្លៃក្រោមស្នាដៃរបស់អាជ្ញាធរក្រោមឱវាទបុរសខ្លាំង
ប្រជាជាតិខ្មែរពិតជាមានមោទកភាពណាស់ នៅពេលដែលខ្មែរមានអក្សរ និងភាសាកំណើតរបស់ខ្លួន ដោយមិនចាំបាច់ខ្ចីអក្សររបស់ជាតិសាសន៍ដៃយកមកជំនួសធ្វើជាអក្សរនិងភាសារបស់ខ្លួន ដូចបណ្តាប្រទេសមួយចំនួនក្នុងសាកលលោកនោះ ។ ប៉ុន្តែប្រជាជាតិខ្មែរក៏ទទួលរងនូវការឈឺចាប់ និងអាម៉ាស់ដែរក្នុងករណីអាជ្ញាធរខ្មែរមិនលើកតម្កើង ឬលើកស្ទួយកិត្យានុភាពអក្សរខ្មែរជាអក្សរកំណើតរបស់ខ្លួនឲ្យថ្កុំថ្កើង បែរជាទាញទម្លាក់ ឬប្រឹងបំបាត់រុញបញ្ចូលទៅក្នុងតុកញ្ចាស់ទៅវិញ ។
ព័ស្តុតាងជាក់ស្តែងបានបង្ហាញថា ថ្វីដ្បិតរដ្ឋធម្មនុញ្ញដែលជាច្បាប់កំពូលនៃព្រះរាជាណាចក្រកម្ពុជា ត្រង់មាត្រា៥បានចែងថា "ភាសា និងអក្សរដែលប្រើជាផ្លូវការ គឺភាសា និងអក្សរខ្មែរ" ក៏ដោយ ក៏នៅតាមការិយាល័យធ្វើការរបស់មន្ត្រីរាជការមានសមត្ថកិច្ចមួយចំនួន ដូចជា ការិយាល័យត្រួតពិនិត្យច្រកទ្វារព្រំដែនអន្តរជាតិប៉ោយប៉ែត ឋិតនៅក្រុងប៉ោយប៉ែត ខេត្តបន្ទាយមានជ័យ ជាដើម បែរជាលុបបំបាត់អក្សរខ្មែរជាអក្សរកំណើត ហើយប្រើប្រាស់អក្សរអង់គ្លេសធ្វើជាស្លាកឈ្មោះការិយាល័យរបស់ខ្លួនថា "The Office of the International Border Check Point of Poipet" យ៉ាងហំហានជំនួសឲ្យអក្សរខ្មែរ ។
មជ្ឈដ្ឋានអ្នកវិភាគកិច្ចការសង្គមនៅកម្ពុជា បានលើកឡើងថា វាមិនខាតបង់អ្វីទេ ប្រសិនបើអាជ្ញាធរក្រសួងមហាផ្ទៃតម្រូវឲ្យការិយាល័យត្រួតពិនិត្យច្រកទ្វារព្រំដែនអន្តរជាតិប៉ោយប៉ែត ឬកន្លែងផ្សេងទៀតប្រើប្រាស់ស្លាកឈ្មោះនៅការិយាល័យធ្វើការជាអក្សរខ្មែរ នៅពីលើអក្សរបរទេស ផ្ទុយទៅវិញវាមានន័យស្មើនឹងការលើកស្ទួយតម្លៃអក្សរខ្មែរជាអក្សរកំណើតរបស់ប្រទេសទៀតផង ។ ការណ៍ដែលអាជ្ញាធរខ្មែរមិនប្រឹងប្រែងលើកតម្កើង ហើយបែរជាព្យាយាមបង្អាប់បង្អោនអក្សរខ្មែរ មិនត្រឹមតែធ្វើឲ្យអក្សរខ្មែរជាអក្សរកំណើតរបស់ប្រទេសខ្មែរបាត់បង់តម្លៃប៉ុណ្ណោះទេ គឺនឹងធ្វើឲ្យបរទេសមើលងាយខ្មែរថែមទៀត ដ្បិតអក្សរខ្មែររបស់ខ្លួនឯងត្រូវបានអាជ្ញាធរខ្មែរមិនឲ្យតម្លៃ បែរជាផ្តល់តម្លៃខ្ពស់ទៅលើអក្សរបរទេស ។
សូមអាជ្ញាធរខ្មែរសម័យព្រះរាជាណាចក្រកម្ពុជាទី២ ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន ហៅបុរសខ្លាំងជានាយករដ្ឋមន្ត្រី មេត្តាធ្វើការពិចារណា និងលើកស្ទួយតម្លៃអក្សរខ្មែរជាអក្សរកំណើតប្រកបដោយមោទកភាពរបស់ជាតិសាសន៍ខ្មែរបន្សល់ទុកពីដូនតាខ្នែរផង ដោយមិនត្រូវរុញអក្សរខ្មែរចូលថតតុកញ្ចាស់ ហើយបែរជាលើកអក្សរបរទេសដាក់លើតុកញ្ចក់នោះឡើយ ៕
Source from: www.dtn7.com
No comments:
Post a Comment