មិត្តនារីៗប្រហែលជាភ្ញាក់ផ្អើលនៅពេលអានចំណងជើងខាងលើនេះមិនខាន។ ជាការពិតណាស់ នារីនឹងរងនូវផលប៉ះពាល់ខាងសុខភាពផ្លូវភេទខ្លាំងជាងបុរស ប្រសិនបើអ្នកសម្រេចរួមភេទនៅថ្ងៃមករដូវ ប៉ុន្តែអ្នកជំនាញបានបង្ហើបពីតិកនិចបញ្ចៀសផលប៉ះពាល់បានខ្លះចំពោះការរួមភេទថ្ងៃមករដូវនេះ។
អ្នកគ្រូ ជា ស៊ីណយ មន្ត្រីសម្របសម្រួលកម្មវិធីជំងឺអេដស៍ ប្រចាំខេត្តកំពង់ធំបញ្ជាក់ថា នៅពេលដែលស្រ្តីមករដូវ គឺជាពេលដែលមាត់ស្បូនរបស់ស្ត្រីចំហ ហើយមានធ្លាប់ឈាមច្រើន។ អំឡុងពេលនោះ គឺជាពេលវេលាមិនសមស្របសម្រាប់ដៃគូរួមភេទជាមួយគ្នាទេ។ “ប្រាកដណាស់ ស្រីៗនៅពេលនោះច្បាស់ជាមានការឈឺចុកចាប់ ដូច្នេះនៅពេលដែលធ្វើការរួមភេទបន្ថែមទៀត នាងច្បាស់ជាទ្រាំនឹងការឈឺចាប់នោះមិនបានទេ”។ មន្ត្រីសម្របសម្រួលកម្មវិធីជំងឺអេដស៍រូបនេះបានបន្ថែម។
រូប ថត៖ couriermail
លើសពីនេះទៅទៀតនោះ ភាគីខាងនារីងាយនឹងរងនូវការរលាកមាត់ស្បូន រលាកដៃស្បូន ហើយអាចនឹងឈានដល់ជំងឺមហារីកមាត់ស្បូន ដែលវាជាបញ្ហាសុខភាពធ្ងន់ធ្ងរសម្រាប់ស្រ្តីទៀតផង។ យ៉ាងណាមិញ ប្រសិនបើដៃគូមិនមែនជាដៃគូមួយទល់នឹងមួយ អ្នកគ្រូ ស៊ីណយ បញ្ជាក់ថា ទាំងបុរស និងស្ត្រីអាចនឹងឆ្លងនូវមេរោគអេដស៍ និងជំងឺកាមរោគទៀតផង។
អ្នកជំនាញរូបនេះបានបន្តទៀតថា៖ “បើដៃគូមួយនិងមួយ ភាគីខាងប្រុសនឹងមិនជួបបញ្ហាអីនោះទេ។ តែបើពួកគេព្រមព្រាងរួមភេទជាមួយគ្នា ពួកគេគួរតែជ្រើសរើសតិចនិករួមភេទថ្នមៗ ដើម្បីជៀសវាងភាគីខាងស្រីមិនអាចទ្រាំបាន ក្នុងពេលមករដូវនេះ”។
ដោយឡែក ការប្រើប្រាស់ស្រោមអនាម័យរួមភេទអំឡុងពេលមករដូវនេះ គឺជាវិធីដែលសុវត្ថិភាពមួយ អាចបញ្ចៀសផុតពីការឆ្លងមេរោគផ្សេងៗ។ យ៉ាងណាមិញ ដើម្បីរក្សានូវសម្ព័ន្ធភាពផ្លូវភេទបានល្អ ភាគីទាំងសងខាងគួរចេះយោគយល់ដល់គ្នា។ “ភាគីខាងស្រីគួរប្រាប់ត្រង់ៗទៅខាងប្រុសចំពោះផលវិបាកនៅពេលមករដូវហើយរួមភេទ ចំណែកឯខាងប្រុស ក៏ត្រូវចេះសម្របខ្លួនទៅតាមនោះដែរ។ យកល្អ គួរកុំរួមភេទនៅថ្ងៃនោះអី”។ នេះជាការបញ្ជាក់បន្ថែមរបស់អ្នកគ្រូ ស៊ីណយ៕
-ចង់ដឹង ពេលមករដូវផឹកស្រាល្អដែរឬអត់? សូមចុចត្រង់នេះ
អត្ថបទ៖ ផល្លា សុម៉ាលីណា
Loading...
Loading...
