ជំនាញគយខេត្តស្វាយរៀងរបស់លោក ឡុញ វណ្ណះ សុខស្រួលក្នុងការប្រមូលលុយ ពីការនាំចូលម៉ូតូគេចពន្ធតាមច្រករបៀងស្រុកចន្ទ្រា
ខេត្តស្វាយរៀង៖តាមសេចក្តីរាយការណ៍ពីប្រជាពលរដ្ឋរស់នៅតាមតំបន់ព្រំដែនខ្មែរ-យួនក្នុងខេត្តស្វាយរៀងបានឱ្យដឹងថាម៉ូតូគេចពន្ធត្រូវបាន ខេត្តស្វាយរៀង ៖ តាមសេចក្តីរាយការណ៍ ពីប្រជាពលរដ្ឋរស់នៅ តាមតំបន់ព្រំដែនខ្មែរ-យួន ក្នុងខេត្តស្វាយរៀង បានឱ្យដឹងថា ម៉ូតូគេចពន្ធត្រូវបាន ឈ្មួញនាំពីស្រុកយួន ចូលមកប្រទេសកម្ពុជា យ៉ាងអនាធិបតេយ្យ យ៉ាងហោចណាស់ក្នុងមួយថ្ងៃៗប្រមាណ៣០ទៅ ៤០គ្រឿង មានដូចជាម៉ាកវ៉េវ ម៉ាក សាលូត ម៉ាកឆ្លាម ម៉ាកអ៊ែអេសអ៊ិច របស់ក្រុមហ៊ុនហុងដា និងម៉ូតូយ៉ាម៉ាហា ដែលផលិតនៅស្រុកយួនហើយម៉ូតូទាំងនោះ ត្រូវបានគេនាំចូលតាមច្រករបៀងនានា នៃតំបន់ព្រំដែន ស្រុកចន្ទ្រា រួចយកមកលាក់ទុក នៅស្រុកស្វាយទាប ហើយនៅពេលមានឱកាសល្អ ទើបក្រុមជនល្មើស នាំចេញទៅបណ្តាខេត្តមួយចំនួន ដូចជាខេត្តកំពង់ចាមជាដើម គេមិនដែលឃើញលោក ឡុញ វណ្ណះ ជាប្រធានសាខាគយខេត្តស្វាយរៀង ចាត់វិធានការបង្ក្រាប ម្តងណាឡើយ។
ប្រជាពលរដ្ឋដែលឃើញ សកម្មភាពជនល្មើស នាំម៉ូតូគេចពន្ធពីស្រុកយួន ចូលទឹកដីខ្មែរបានឱ្យដឹងថាក្រុមអ្នករកស៊ីនាំម៉ូតូគេចពន្ធភាគច្រើន មានទីលំនៅម្តុំផ្សារប្រសូតិ រួចជួលអ្នកជិះតាមផ្លូវជាតិលេខ១ តម្រង់ទៅខេត្តស្វាយរៀង រួចបត់ឆ្លងតាមស្រុករមាសហែក ឆ្ពោះទៅខេត្តកំពង់ចាម។ អ្នកស៊ីឈ្នួលជិះម៉ូតូឱ្យគេនោះ គឺក្នុងមួយជើងបាន ៣ម៉ឺនរៀល ហើយសោហ៊ុយហូបចុក និងស៊ីចាយតាមផ្លូវ ក៏ដូចជាការធ្វើដំណើរត្រឡប់មកវិញ គឺថៅកែជាអ្នកចេញ។ អ្នកស៊ីឈ្នួលបើកម៉ូតូ ពីខេត្តស្វាយរៀង ឆ្លងកាត់ស្រុករមាសហែក ឆ្ពោះទៅខេត្តកំពង់ចាម គឺប្រើពេលតែ ៣ទៅ៤ ម៉ោងប៉ុណ្ណោះ ហើយអ្នកខ្លះក្នុងមួយថ្ងៃ គេជិះបានដល់ទៅពីរជើង។ ការជិះម៉ូតូគេចពន្ធ ឆ្លងកាត់ខេត្តស្វាយរៀង ទៅកាន់ខេត្តកំពង់ចាម គឺមានជាក្រុមដែលក្នុងមួយក្រុមមាន ៥ទៅ៦ម៉ូតូ ហើយមិនដែលឃើញមាន សមត្ថកិច្ចពាក់ព័ន្ធណា ចាត់វិធានការទប់ស្កាត់ទេ ។
ប្រជាពលរដ្ឋដែលរស់នៅ ក្នុងស្រុកស្វាយទាប ខេត្តស្វាយរៀង បានឱ្យដឹងថា តម្លៃម៉ូតូគេចពន្ធនាំចូលពីប្រទេសយួន ក្នុងមួយគ្រឿងពី ៤០០ទៅ៨០០ ដុល្លារ ហើយម៉ូតូទាំងនោះ មានតម្លៃថ្លៃឬថោក គឺទៅតាមស៊េរី និងទៅតាមប្រភេទរបស់វា។ ឈ្មួញរកស៊ីនាំម៉ូតូគេចពន្ធ ក្នុងស្រុកស្វាយទាប មានម៉ូយរបស់គេនៅម្តុំសាម៉រ និងនៅភូមិកណ្តៀងរាយ ហើយនៅពេលដែល ជនជាតិយួនជិះមកទុក តាមផ្ទះម៉ូយនៅក្បែរព្រំដែនបានច្រើន ទើបឈ្មួញទៅយកមកចែកចាយបន្ត។ ម៉ូតូគេចពន្ធទាំងនោះ ត្រូវបានគេនាំចូលយ៉ាងអនាធិបតេយ្យ ហើយភាគច្រើន គេនាំចូលចាប់ពីម៉ោង ៤ទៀបភ្លឺ ដល់លោក ៨ព្រឹកយ៉ាងគគ្រឹកគគ្រេង។ សមត្ថកិច្ចដែលឈរជើង នៅតាមផ្លូវគឺគ្រាន់តែ អ្នកបើកម៉ូតូបង់លុយ ក្នុងមួយកន្លែងចាប់ពី២០០០រៀល ទៅ៤០០០រៀលក្នុងមួយគ្រឿង ជាការស្រេចគ្មានអ្វីរំខានឡើយ។
ទាក់ទងនឹងបញ្ហាខាងលើនេះ មន្ត្រីគយខេត្តស្វាយរៀងរបស់លោក ឡុញ វណ្ណះ និងសមត្ថកិច្ចនៅតាមព្រំដែន បានរក្សាភាពស្ងៀមស្ងាត់ធ្វើដូចជា មិនដឹងមិនឮអ្វីទាំងអស់ បណ្តោយឱ្យបទល្មើស នាំម៉ូតូគេចពន្ធចូលស្រុកខ្មែរ កើតឡើង យ៉ាងអនាធិបតេយ្យតែម្តង។ ប្រជាពលរដ្ឋមានការសង្ស័យថា សមត្ថកិច្ចព្រំដែន និងគយខេត្តស្វាយរៀងរបស់លោក ឡុញ វណ្ណះ អាចទទួលបានផលប្រយោជន៍ ពីក្រុមឈ្មួញរកស៊ី នាំម៉ូតូគេចពន្ធចូលស្រុកខ្មែរ ទើបនាំគ្នាសម្ងំ ដើម្បីផលប្រយោជន៍។ ជាក់ស្តែងនៅច្រករបៀង និងច្រកអន្តរជាតិបាវិត ក៏មានក្រុមឈ្មួញនាំទំនិញគេចពន្ធ និងម៉ូតូគេចពន្ធចូលទឹកដីខ្មែរ យ៉ាងអនាធិបតេយ្យដែរ ប៉ុន្តែមិនដែលឃើញ សមត្ថកិច្ចពាក់ព័ន្ធចាត់វិធានការ បង្ក្រាបទាល់តែសោះ ។ មិនតែប៉ុណ្ណោះ សមត្ថកិច្ចច្រកព្រំដែន តែងតែបើកឱ្យជនជាតិយួន ចូលមកប្រកបរបររកស៊ីលើទឹកដីខ្មែរ តាមអំពើចិត្តធ្វើឱ្យប៉ះពាល់ ដល់មុខរបរ របស់ពលរដ្ឋតាមព្រំដែន។
សមត្ថកិច្ចច្រកព្រំដែនមួយចំនួន បានគេចវេះពីការសាកសួរ របស់អ្នកសារព័ត៌មានជុំវិញ បទល្មើសនាំម៉ូតូគេចពន្ធចូលស្រុកខ្មែរ ក្នុងមួយថ្ងៃៗរាប់សិបគ្រឿង ធ្វើឱ្យបាត់បង់ចំណូលពន្ធរដ្ឋ យ៉ាងច្រើនក្នុងមួយខែៗ។ សូម្បីតែអធិការនគរបាលស្រុកស្វាយទាប ដែលជាតំបន់ឈ្មួញនាំចូល និងស្តុកទុកម៉ូតូគេចពន្ធមុនពេលនាំទៅកាន់ បណ្តាខេត្តផ្សេងៗទៀតនោះ បែរជាឆ្លើយថា មិនបានដឹងអំពីការនាំចូល ម៉ូតូគេចពន្ធទៅវិញ ដែលប្រការនេះធ្វើឱ្យប្រជាពលរដ្ឋ រិះគន់យ៉ាងខ្លាំង។ ប្រជាពលរដ្ឋអំពាវនាវ ឱ្យក្រសួងនិងស្ថាប័នពាក់ព័ន្ធ ពិនិត្យមើលឡើងវិញ អំពីការងាររបស់ជំនាញគយ នៅខេត្តស្វាយរៀង ក្រោមការគ្រប់គ្រងរបស់លោក ឡុញ វណ្ណះ និងសមត្ថកិច្ចប្រចាំច្រកព្រំដែន ព្រោះសព្វថ្ងៃនេះពួកគេ កំពុងបើកដៃឱ្យជនល្មើសធ្វើអ្វីៗ ស្រេចតែអំពើចិត្ត ដើម្បីប្រមូលផលប្រយោជន៍ ធ្វើមានធ្វើបានផ្ទាល់ខ្លួន មិនគិតគូរដល់ផលប្រយោជន៍ជាតិ៕
Source from: watphnom-news.com
No comments:
Post a Comment