លោក ឡុង រុក្ខា មានឈ្មោះស៊ីប្រាក់ខែ ក្នុងក្របខ័ណ្ឌនគរបាលជាតិ និងស៊ីប្រាក់ខែពីក្រុមឈ្មួញដឹកជញ្ជូនឈើខុសច្បាប់ ល្បីពេញខេត្តរតនគិរី
ខេត្តរតនគិរី៖បច្ចុប្បន្ននេះរថយន្តទំនើបៗគ្រប់ប្រភេទមិនតិចជាង១០០គ្រឿងក្នុងមួយថ្ងៃបានសម្រុកដឹកជញ្ជូនឈើប្រណីតចេញទៅលក់នៅស្រុកយួនខេត្តរតនគិរី ៖ បច្ចុប្បន្ននេះរថយន្តទំនើបៗ គ្រប់ប្រភេទមិនតិចជាង ១០០គ្រឿង ក្នុងមួយថ្ងៃ បានសម្រុកដឹកជញ្ជូនឈើប្រណីត ចេញទៅលក់នៅស្រុកយួន យ៉ាងប្រសេចប្រសាច តាមដងផ្លូវជាតិលេខ៧៨ ពីក្រុងបានលុង រហូតដល់ព្រំដែនប្រទេសយួន គេមិនដែលឃើញសមត្ថកិច្ច និងមន្ត្រីជំនាញពាក់ព័ន្ធ ចាត់វិធានការបង្ក្រាប ឲ្យមានប្រសិទ្ធភាពម្តងណាឡើយ មិនដឹងជាមានអាថ៌កំបាំងអ្វីទេ សូម្បីតែលោក ឡុង រុក្ខា ជាប្រធាននគរបាល អន្តោប្រវេសន៍ ប្រចាំច្រកអន្តរជាតិអូរយ៉ាដាវ ក៏មិនហ៊ានហើបមាត់ ពីការដឹកជញ្ជូនឈើយ៉ាងអនាធិបតេយ្យ ដែលកំពុងផ្គើនបទបញ្ជា របស់រដ្ឋាភិបាល ។
សេចក្តីរាយការណ៍ពីខេត្តរតនគិរី បានឲ្យដឹងថា ប្រជាពលរដ្ឋរស់នៅអមសងខាង ផ្លូវជាតិលេខ៧៨ មិនសូវហ៊ានធ្វើដំណើរចេញពី ផ្ទះសម្បែងរបស់ខ្លួននោះទេ ដោយសារតែខ្លាចរថយន្តដឹកឈើ ដែលបើកប្រដេញគ្នា យ៉ាងប្រសេចប្រសាច អាចបង្កគ្រោះថ្នាក់ដល់អាយុជីវិត ប្រជាពលរដ្ឋតាមដងផ្លូវ។ រថយន្តដឹកជញ្ជូនឈើទំនើបៗ ដូចជាម៉ាកធុនដ្រា ឡង់គ្រីស័រ ឡិចស៊ីស សាំយ៉ុង កាមរីច្នៃ បាឡែន មិនតិចជាង ១០០គ្រឿងនោះទេ បានធ្វើសកម្មភាពដឹកជញ្ជូនឈើខុសច្បាប់ ចេញទៅលក់នៅស្រុកយួន តាមច្រកអន្តរជាតិអូរយ៉ាដាវ ច្រករបៀងភ្នំក្រហម និងច្រករបៀង១៩ នៅក្រោយកាស៊ីណូ របស់ឧកញ៉ា ទ្រី ភាព មិនដែលមានការបង្ក្រាបទប់ស្កាត់ម្តងណាឡើយ ។
មានការបញ្ជាក់ផងដែរថា សមត្ថកិច្ចនិងមន្ត្រីជំនាញ ដែលដាក់ប៉ុស្តិ៍ជជុះជាហូរហែ តាមផ្លូវជាតិលេខ៧៨ តាំងពីក្រុងបានឡុង រហូតដល់ច្រកព្រំដែនយួន កំពុងត្រូវប៉ាន់ក្នុងការប្រមូលលុយ ពីជំនួញឈើខុសច្បាប់ ទើបគ្មានការបង្ក្រាប ហើយឈ្មួញទាំងតូចទាំងធំ បានប្រើប្រាស់លុយទិញទឹកចិត្ត មន្ត្រីរដ្ឋបាលព្រៃឈើ និងសមត្ថកិច្ចពាក់ព័ន្ធ ដែលស៊ីប្រាក់ខែរដ្ឋ ឲ្យចូលដៃចូលជើងឃុបឃិត ជាមួយជំនួញឈើខុសច្បាប់ របស់ពួកគេយ៉ាងរលូនល្អ។ រឿងដែលគ្មានការបង្ក្រាប ក៏ព្រោះតែក្រុមឈ្មួញចេះគិតគូរ បង់លុយឲ្យសមត្ថកិច្ច និងមន្ត្រីជំនាញគ្រប់ជាន់ថ្នាក់ ហើយអ្វីៗអាចដំណើរការដោយរលូន ក៏ព្រោះតែលោក ឡុង រុក្ខា ជាមេនគរបាលអន្តោប្រវេសន៍ប្រចាំ ច្រកអន្តរជាតិអូរយ៉ាដាវ ជាអ្នកឃុបឃិតបិទភ្នែក ឲ្យក្រុមឈ្មួញធ្វើអ្វីៗតាមតែអំពើចិត្ត។
គេដឹងថា ឡានទំនើបៗទាំងនោះ សុទ្ធសឹងជារបស់ឈ្មួញធំៗ ដឹកឈើមកពីចំណុចស្រុកវ៉ឺនសៃ ស្រុកតាវែង ស្រុកកូនមុំ និងស្រុកអូរជុំ ចេញទៅស្រុកយួន តាមចំណុចច្រករបៀង១៩ និងច្រករបៀងភ្នំក្រហម ដែលច្រករបៀងទាំង ២នេះ គ្រប់គ្រងដោយសមត្ថកិច្ច ច្រកទ្វារអន្តរជាតិអូរយ៉ាដាវ ដឹកនាំដោយលោក ឡុង រុក្ខា។ ដោយឡែក កម្លាំងនគរបាលវរៈការពារព្រំដែនលេខ៦២៣ និងកម្លាំងយោធាវរៈការពារព្រំដែនលេខ១០២ ក៏មានសិទ្ធិអំណាចឈរជើង ការពារច្រករបៀងទាំង ២កន្លែងនេះផងដែរ ប៉ុន្តែពួកគេមិនដែលអើពើ បង្ក្រាបការដឹកជញ្ជូនឈើខុសច្បាប់ទាំងនោះទេ គឺគ្រប់ផ្នែកទាំងអស់ នាំគ្នាសម្ងំយ៉ាងសុខស្រួល ក្នុងការប្រមូលលុយពីជំនួញឈើខុសច្បាប់ យកទៅធ្វើមានធ្វើបានផ្ទាល់ខ្លួន។
គេមិនច្បាស់ទេថា តើលោក ឡុង រុក្ខា ប្រធាននគរបាលអន្តោប្រវេសន៍ ប្រចាំច្រកអន្តរជាតិអូរយ៉ាដាវ ទទួលបានផលប្រយោជន៍ប៉ុន្មាន ពីជំនួញឈើខុសច្បាប់នោះទេ ព្រោះក្នុងតួនាទីជាប្រធានច្រក អន្តរជាតិអូរយ៉ាដាវ ដែលគ្រប់គ្រងច្រករបៀង១៩ និងច្រករបៀងភ្នំក្រហម លោក ឡុង រុក្ខា កំពុងតែសម្ងំកើបលុយពីការហូរចូល ទំនិញគេចពន្ធពីស្រុកយួនផង និងឃុបឃិតបិទភ្នែក ឲ្យក្រុមឈ្មួញទាំងតូចទាំងធំរកស៊ី ដឹកជញ្ជូនឈើខុសច្បាប់ ចេញទៅស្រុកយួនផង។ រឿងដែលគួរឲ្យភ្ញាក់ផ្អើលបំផុតគេដឹងថា លោក ឡុង រុក្ខា មានឈ្មោះស៊ីប្រាក់ខែ ក្នុងក្របខ័ណ្ឌជានគរបាលជាតិផង ហើយប្រភពខ្សឹបខ្សៀវខ្លះ ក៏បានបង្ហើបឲ្យដឹងផងដែរថា លោក ឡុង រុក្ខា ក៏មានឈ្មោះស៊ីប្រាក់ខែពីក្រុមហ៊ុនឧកញ៉ា ទ្រី ភាព ដែលសកម្មបំផុតក្នុងការ ដឹកជញ្ជូនឈើប្រណីតចេញទៅស្រុកយួន តាមច្រកអន្តរជាតិអូរយ៉ាដាវផងដែរ៕
Source from: watphnom-news.com
No comments:
Post a Comment