ផ្សារទំនើប AEON បើកភ្លាមល្បីភ្លែត គឺស្លាកឈ្មោះមិនប្រើអក្សរខ្មែរ និងទទួលផ្ញើម៉ូតូតម្លៃ១.០០០រៀល តែមិនទទួលខុសត្រូវ
ផ្សារទំនើបមួយឈ្មោះ AEON Mall វិនិយោគដោយក្រុមហ៊ុនជប៉ុននៅកម្ពុជាឈ្មោះ AEON Mall (Cambodia) Co.,Ltd. ដែលប្រើប្រាស់ថវិកាអស់ចំនួនប្រមាណ២០០លានដុល្លារអាមេរិកនោះ ត្រូវបានសម្ពោធដាក់ឲ្យប្រើប្រាស់ជាផ្លូវការ ក្រោមអធិបតីភាពដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រីនៃព្រះរាជាណាចក្រកម្ពុជា និងឯកឧត្តម Fumio Kishida រដ្ឋមន្ត្រីក្រសួងការបរទេសជប៉ុន កាលពីថ្ងៃទី៣០ ខែមិថុនា ឆ្នាំ២០១៤កន្លងទៅ បានធ្វើឲ្យមជ្ឈដ្ឋាននានាចាប់អារម្មណ៍យ៉ាងខ្លាំង ដ្បិតផ្សារទំនើបនេះត្រូវបានគេរំពឹងទុកថា នឹងក្លាយជាគំរូក្នុងការចាប់ផ្តើមផ្លាស់ប្តូររបៀបលក់ដូរ និងការធ្វើពាណិជ្ជកម្មនៅកម្ពុជា ។
ទន្ទឹមនឹងការបើកដំណើរការភ្លាម គឺផ្សារទំនើបមួយនេះចាប់ផ្តើមល្បីភ្លែតតែម្តង ដោយសារប្រជាពលរដ្ឋខ្មែរចាប់អារម្មណ៍ថា ស្លាកឈ្មោះផ្សារទំនើបទាំងមូលមិនប្រើប្រាស់អក្សរខ្មែរ រួមជាមួយភាសាបរទេសឡើយ និងម្យ៉ាងទៀត ការទទួលផ្ញើទោចក្រយានយន្តរបស់អតិថិជនដែលគិតតម្លៃរហូតដល់ចំនួន១.០០០រៀល នៅពេលផ្ញើម្តងសម្រាប់ទោចក្រយានយន្តមួយគ្រឿង បែរជាគ្មានការទទួលខុសត្រូវទៅវិញ ។
សំបុត្រផ្ញើទោចក្រយានយន្តចូលទៅទិញទំនិញនៅផ្សារទំនើប AEON Mall ដែលត្រូវបានបង្ហាញដោយអតិថិជនម្នាក់កាលពីថ្ងៃទី០១ ខែកក្កដា ឆ្នាំ២០១៤ម្សិលមិញ បានបញ្ជាក់អំពីចំណុចសម្គាល់នៅក្នុងសំបុត្រនោះចំនួន៣ចំណុច គឺ ៖ -ហួសរយៈពេល១ថ្ងៃចាត់ទុកជាអសារបង់, សូមថែរក្សាយានយន្ត និងសម្ភារៈដោយខ្លួនឯង និង -ក្នុងករណីបាត់សំបុត្រ ត្រូវបង់ប្រាក់១០.០០០រៀល ។
ក្រុមអតិថិជនរបស់ផ្សារទំនើប AEON Mall ដែលបានផ្ញើទោចក្រយានយន្តនៅទីនោះ បានលាន់មាត់គ្រប់គ្នាៗថា "ផ្ញើម៉ូតូយកតម្លៃរហូតដល់ទៅ ១.០០០រៀល តែក្នុងសំបុត្របញ្ជាក់ថា ឲ្យថែរក្សាយានយន្ត និងសម្ភារៈដោយខ្លួនឯង ។ ដូច្នេះ តើចាំបាច់ផ្តល់សំបុត្រទទួលផ្ញើម៉ូតូធ្វើអ្វីទៅ បើមិនទទួលខុសត្រូវដដែលជាដដែលនោះ ? " ។
តាមការអះអាងរបស់ក្រុមហ៊ុនដែលវិនិយោគបង្កើតផ្សារទំនើប AEON Mall នោះ បានឲ្យដឹងថា ទីតាំងផ្សារអាចចតរថយន្តបានចំនួន ១.៤០០គ្រឿង និងទោចក្រយានយន្តចំនួន ១.៦០០គ្រឿង ។
គេហទំព័រសារព័ត៌មានដើមត្នោតមិនទាន់អាចសុំការបំភ្លឺបញ្ជាក់ពីអាជ្ញាធរ និងពីអ្នកគ្រប់គ្រងផ្សារទំនើប AEON Mall ទាក់ទងនឹងរឿងស្លាកឈ្មោះផ្សារមិនប្រើប្រាស់អក្សរខ្មែរ និងទទួលផ្ញើទោចក្រយានយន្តមិនទទួលខុសត្រូវ នោះនៅឡើយទេ ត្រឹមថ្ងៃទី០២ ខែកក្កដា ឆ្នាំ២០១៤នេះ ៕
Source from: www.dtn7.com
No comments:
Post a Comment